Nashik News : सामान्य नागरिकांना सहाशे रुपयात वाळू देण्याची घोषणा होऊन वर्ष होईल, पण सामान्यांना अजूनही सहाशे रुपयांत वाळू मिळण्याची चिन्हे दिसेनात.

शासनस्तरावर घोषणा झाली, प्रशासकीय पातळीवर तयारी सुरू झाली पण या धोरणाला अपेक्षित प्रतिसाद मिळत नसल्याने सहाशे रुपयात वाळू हे दिवास्वप्नच राहणार का असा प्रश्न आहे.(common man will still see no signs of getting sand for 600 rupees nashik news )

मागील मे महिन्यात शासनाने सामान्यांना सहाशे रुपयांत वाळू देण्याचे जाहीर केले. पण पुढील मे महिन्यापर्यंत हा विषय मार्गी लागेल असे वाटत नाही. पहिल्या टप्प्यात त्याला विरोध झाला. अनेक भागात प्रतिसाद मिळाला नाही. दिवाळीपूर्वी काढलेल्या निविदा प्रक्रियेची हीच स्थिती आहे. अवघ्या तीन ठिकाणीच प्रतिसाद मिळाल्याने घोषणेला वर्ष झाल्यानंतर तरी प्रतिसाद मिळणार का हा प्रश्न आहे.

शासनाच्या नवीन वाळू धोरणानुसार जिल्हाधिकारी कार्यालयाने पुन्हा एकदा जोमाने प्रयत्न करताना दिवाळीपूर्वी बागलाण, नांदगाव, नांदगाव, कळवण, देवळा व मालेगाव तालुक्यांतील तेरा वाळू डेपोसाठी निविदा प्रसिद्ध केल्या. मात्र, यापैकी केवळ कळवण तालुक्यातील तीन टेंडरला प्रतिसाद मिळाला.

उर्वरित एकाही टेंडरला प्रतिसाद मिळालेला नाही. यामुळे मागील हंगामाप्रमाणे यंदाही जिल्ह्यातील वाळू डेपोसाठी ठेकेदार मिळण्याचा मार्ग अवघड आहे. सध्या फक्त निफाड तालुक्यातील चांदोरी, जळगाव तसेच नाशिक तालुक्यातील चेहेडी येथील तीन ठिकाणी वाळू घाटावरून वाळू उपसा सुरु आहे.

जिल्हयात सुरवातीला १३ वाळू घाटांना परवानगी देण्यात आली, पुढे त्यांची संख्या वाढून १६ झाली. मालेगाव तालुक्यात कळवण, देवळा, बागलाण, निफाड, नांदगाव, निफाड या तालुक्यांमध्ये १६ वाळू घाट व ३६ डेपो निश्चित करण्यात आले आहेत. या वाळू घाटावरून मागील हंगामात पावसाळ्यापूर्वी ९० हजर मेट्रिक टन वाळू उपसा करण्याचे निश्चित करण्यात आले.