नाशिक : एकीकडे जिल्ह्यात नव्याने आढळणार्या कोरोना बाधितांची संख्या कमी होत असतांना, कोरोनाच्या बळींचे प्रमाण गेल्या काही दिवसांत घटल्याची दिलासादायक स्थिती आहे. मंगळवारी (ता.२०) नाशिक महापालिका हद्दीत एकाही रूग्णाचा कोरोनामुळे मृत्यू झाला नाही. तब्बल १४२ दिवसांनंतर शहरात दिवसभरात एकही मृत्यू झाला नसल्याची नोंद आहे. मंगळवारी दिवसभरात ४३४ नवीन बाधित आढळले असून, ५५९ रूग्ण कोरोनामुक्त झाले आहेत. तर तीन रूग्णांचा जिल्ह्यात कोरोनामुळे मृत्यू झाला. जिल्ह्यातील एकूण कोरोना बाधितांच्या संख्येने नव्वद हजारांचा आकडा ओलांडला आहे.
एकूण मृत्यूंचा आकडा १ हजार ६१३
गेल्या ३१ मेस नाशिक शहरात कोरोनामुळे एकही मृत्यू झाला नव्हता. त्यानंतर दर दिवशी शहरातून किमान एकतरी कोरोनाचा बळी जात होता. मंगळवारी झालेल्या तीन मृत्यूंमध्ये निफाड तालुक्यातील लासलगाव येथील ६१ वर्षीय पुरूष तर डोंगरगाव येथील ६५ वर्षीय महिला रूग्णाचा अशा नाशिक ग्रामीण भागातील दोन रूग्णांचा उपचारादरम्यान मृत्यू झाल्याची नोंद आहे. तर मालेगाव महापालिका हद्दीत ६१ वर्षीय पुरूषाचा मृत्यू झाला आहे. यातून जिल्ह्यातील एकूण मृत्यूंचा आकडा १ हजार ६१३ झाला आहे.
नव्वद हजारांचा आकडा ओलांडला
दिवसभरात आढळलेल्या नवीन कोरोना बाधितांमध्ये नाशिक शहरातील ३०८, नाशिक ग्रामीणचे १११, मालेगावचे दहा तर जिल्हाबाह्य पाच बाधितांचा समावेश आहे. तर कोरोनामुक्त झालेल्यांमध्ये नाशिक शहरातील २२६, नाशिक ग्रामीणचे २९१, मालेगावचे ३४ तर जिल्हाबाह्य आठ रूग्णांनी कोरोनावर मात केली आहे. जिल्ह्यातील एकूण कोरोना बाधितांच्या संख्येने नव्वद हजारांचा आकडा ओलांडला असून, आतापर्यंत ९० हजार ०७० बाधित आढळून आले आहेत. यापैकी ८१ हजार ९३७ रूग्णांनी कोरोनावर मात केली असून, सद्यस्थितीत ६ हजार ५२० बाधितांवर उपचार सुरू आहेत.
दिवसभरात दाखल रूग्णांमध्ये नाशिक महापालिका रूग्णालये व गृहविलगीकरणात ९२७, नाशिक ग्रामीण रूग्णालये व गृहविलगीकरणात ७१, मालेगाव महापालिका रूग्णालये १०, डॉ. वसंत पवार वैद्यकीय महाविद्यालय रूग्णालयात आठ तर जिल्हा रूग्णालयात तीन रूग्ण दाखल केले आहेत. सायंकाळी उशीरापर्यंत ९९२ रूग्णांचे अहवाल प्रलंबित होते.
संपादन - रोहित कणसे
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.