नाशिक : नाशिक -पुणे रोडवरील गांधीनगर येथील लष्करी हद्दीतील दोघा अधिकाऱ्यांना सीबीआयच्या लाचलुचपत प्रतिबंधक विभागाच्या पथकाने सव्वा लाखांची लाच घेतल्याप्रकरणी अटक केली आहे.

सदरील गुन्ह्यातील मेजर हिमांशू मिश्रा व ज्युनिअर इंजिनिअर मिलिंद वाडिले हे दोघे गॅरिसन इंजिनिअरमध्ये कार्यरत अधिकारी आहेत. कॉम्बॅक्ट आर्मी एव्हिएशन ट्रेनिंग स्कूल (कॅट्स) या ठिकाणी ते कार्यरत नव्हते, असा खुलासा संरक्षण विभागाच्या पुणे कार्यालयाचे जनसंपर्क अधिकारी महेश अयंगार यांनी केला आहे.(Crime update Two bribe takers are Garrison Engineer Officers Nashik Crime News)

ठेकेदाराच्या तक्रारीनुसार, मेजर मिश्रा व वाडिले यांनी त्यांच्याकडे लाचेची मागणी केली होती. त्या संदर्भात ठेकेदाराने सीबीआयच्या लाचलुचपत प्रतिबंधक विभागाच्या मुंबई कार्यालयाकडे तक्रार केली होती. त्यानुसार पथकाने गुरुवारी (ता.१३) रात्री सापळा रचला होता. ठेकेदाराकडून मेजर मिश्रा व वाडिले यांनी १ लाख २० हजार रुपयांची लाचेची रक्कम स्वीकारली. त्यावेळी दबा धरून असलेल्या सीबीआयच्या पथकाने दोघांना रंगेहाथ अटक केली होती.