नाशिक : (नांदगाव) तालुक्‍यातील भार्डी येथील शेतकरी देवीदास मार्कंड यांनी कल्पकता दाखवीत उत्पन्न मिळविण्याचा नवा मार्ग शोधलाय...देवीदास यांच्या प्रयोगशीलतेने क्षणभर भारावलेल्या कृषिमंत्री दादा भुसे यांच्यासह आमदार सुहास कांदे यांनी देवीदास मार्कंड यांचे मनापासून कौतुक केले. 

उत्पन्न मिळविण्याचा नवा मार्ग

कोरोनाच्या पार्श्वभूमीवर मार्कंड यांनी आपल्या फुललेल्या शेतीतले उत्पन्न वाया जाऊ नये म्हणून कल्पकता दाखवीत उत्पन्न मिळविण्याचा नवा मार्ग शोधला. त्यांनी व्यापाऱ्याच्या दारात जाण्याऐवजी त्यालाच आपल्या दारात बोलाविले. शिवाय ग्राहक थेट बांधावर यावे म्हणून सोशल मीडियाचा वापर करीत सुमारे तीन लाख रुपयांची टरबूज विकली. एवढ्यावरच न थांबता उन्हाळ्यात लावलेला स्वीट कॉर्नची विक्रीही सुमारे दोन लाख रुपयांची केली. सध्या मार्कंड यांच्या शेतात अडीच एकरांत आद्रक आहे. दोन एकरांत पुन्हा स्वीट कॉर्न लावला आहे. एकरभर अंकुर वाणाचा वाल वेलींवर डौलात असून, तीस रुपये किलो दराने त्याची विक्रीही सुरूच आहे. 

हेही वाचा > हायटेक सल्ला पडला महागात; दोन एकरांतील ऊस जळून खाक...नेमके काय घडले?

कृषिमंत्र्यांची भेट सर्वार्थाने सार्थ

घरगुती ग्राहक असो की खरेदीदार, व्यापारी त्याला तो घेण्यासाठी मात्र देवीदास मार्कंड यांच्या बांधावरच जावे लागते. शेतकरी ग्राहकापर्यंत कसा पोचू शकतो हे आवर्जून बघण्यासाठी व त्यांच्या शेतातील मका पिकात एकात्मिक कीड व्यवस्थापन व भाजीपाला पिकांची लागवड बघून कृषिमंत्री दादा भुसे यांची भेट सर्वार्थाने सार्थ ठरली. तालुका कृषी अधिकारी जगदीश पाटील, शिवसेनेचे तालुकाप्रमुख किरण देवरे, जिल्हा मजूर संघाचे प्रमोद भाबड उपस्थित होते. 

हेही वाचा > आयुक्तांची रात्री उशिरा रुग्णालयात एंट्री...चौकशीत मोठा खुलासा...नेमके काय घडले?