लखमापूर (जि. नाशिक) : दिंडोरी तालुक्यात दोन दिवस मॉन्सूनच्या पावसाने हजेरी लावत दमदार सुरवात केली. परंतु परत पावसाने लहरीपणा दाखवत पोबारा केला. त्यामुळे आता पावसांचे काय गणित राहील, याने शेतकरी चिंताक्रांत आहे. दिंडोरी तालुका धरणांचा तालुका म्हणून ओळखला जातो. त्यामुळे तालुक्यांसह मनमाड, येवला, निफाडलाही येथील धरणातील पाण्यावर अवलंबून राहावे लागते. सध्या धरणांतील पाणी साठ्यात मोठी घट झाल्याने तोही चिंतेचा विषय आहे.

दोन दिवस पावसाने दिंडोरी तालुक्यात हजेरी लावल्याने शेतकरी वर्गाच्या खरिपावरील अपेक्षा वाढल्या होत्या. परंतु पावसाने दडी मारल्याने शेतकरी खरीप हंगामाला उशीर होईल यामुळे भयभीत झाला आहे.

जून अर्धा संपत आला, परंतु अजून दमदार पाऊस न पडल्याने व जमिनीत पेरणीसाठी योग्य ओल न झाल्याने खरिपाच्या पेरण्या लांबणीवर पडणार आहेत. तालुक्यात मागील वर्षाचा अंदाज जर घेतला तर यंदा सोयाबीन, मका, भुईमूग, उडीद, मुगाला मोठी पसंती मिळण्याची शक्यता निर्माण झाली आहे. परंतु सध्या तालुक्यातील पेरणी तपशील जर पाहिला तर अंदाजे दहा टक्केही पेरण्या झालेल्या नाहीत. त्याचा परिणाम रब्बीवरसुद्धा उत्पन्न घटीवर होईल. दिंडोरी तालुक्यात दोन दिवस पाऊस झाला. परंतु त्यांचा शेतीला उपयोग न होता. नुकसानच झाले. अनेक झाडे निखळून पडली, विजेचे असंख्य खांब जमीनदोस्त झाली. त्यामुळे गावे अंधारात होती. तालुक्यात भात पीक मोठ्या प्रमाणावर घेतले जाते. परंतु जमिनीत ओलावा नसल्याने यंदा भाताच्या आवणीला विलंब होणार आहे. सध्या धरणातील पाण्याची पातळी घटल्याने तोही एक चिंतेचा विषय बनला आहे. त्यामुळे सर्व शेतकरी वर्गाला आता जोरदार पावसांची प्रतीक्षा आहे.

दिंडोरी तालुक्यातील धरणांची पाणी साठा स्थिती :-

१) करजंवण : ६.५० टक्के

२) वाघाड :- २.६६ टक्के

३) पुणेगाव :- ६.६८ टक्के

४) तिसगाव :- ०.७७ टक्के

५) ओझरखेड:-२५.४३ टक्के

६) पालखेड :- २९.४३ टक्के

गेल्या वर्षी दिंडोरी तालुक्यात ८९० मिलिमीटर पाऊस झाला होता.