सायगाव (जि. नाशिक) : येवला तालुक्यातील उत्तर पूर्व भागातील सायगाव परिसरातील गावांत यंदा जास्त पावसाने खरीपाच्या सर्वच पिकांचे मोठे नुकसान झाले. घटलेले उत्पादन, वाढता उत्पादन खर्च त्यात भावही नसल्याने शेतकऱ्यांच्या हातात काहीच शिल्लक राहिले नाही. शासकीय पातळीवरही ना मदत, ना पिकविमा मिळाल्याने मोठा खर्च करूनही कर्जबाजारी होण्याची वेळ शेतकऱ्यांवर आल्याने अस्वस्थतता पसरली आहे. 

शेतकरी परिस्थीती बिकट

रब्बी हंगामातही सततच्या ढगाळ वातावरणामुळे विविध रोगाचा प्रार्दुभाव होत असल्याने अपेक्षित उत्पन्न मिळण्याची चिन्हे दिसत नसल्याने संकटात भर पडली आहे. यंदाच्या खरीपात कधी झाले नाही इतके नुकसान मूग, बाजरी, भुईमुग, मका, कपाशी, कांदा यासह सर्वच पिकांचे झाले आहे. मूग अक्षरश: सडल्याने निम्माही भाव मिळाला नाही. बाजरीचे उत्पादन घटून चारा खराब झाला. बाजरीचे दाणेही खराब झाल्याने या बाजरीला बाजारात क्विंटलला हजार रुपये दर अवघड झाले आहेत. मकाचे उत्पादनही निम्म्यावर आले आहे. कपाशीचे तर सर्वात जास्त नुकसान झाले असून पंचवीस टक्केच उत्पादन हातात आले. कांदा पिकांची स्थितीही वाईट झाली आहे. अशा स्थितीत नुकसान झालेल्या सर्वच पिकांचे पंचनामे करून मदत मिळणे गरजेचे असताना फक्त कांदा पिकांचे पंचनामे झाले. ती तोडकी मदत आता शेतकऱ्याच्या खात्यावर जमा होत आहे. इतर कोणत्याच पिकाला ना नुकसान भरपाई मिळाली, ना पिक विमा यामुळे शेतकरी वाऱ्यावर आहेत. 
 

हेही वाचा - वडिलांसोबतची लेकीची 'ती' ड्राईव्ह शेवटचीच; पित्याचा ह्रदय पिळवटून टाकणारा आक्रोश

शेतीत पिकांसाठी फक्त खर्च झाला. हातात कवडीही शिल्लक राहिली नाही. शासन स्तरावरुन मदत, पिकविमा मिळेल अपेक्षित होते. पण काहीच मदत मिळाली नसल्याने कर्जबाजारी होण्याची वेळ आली आहे. 
- सुनिल देशमुख, शेतकरी, सायगाव 

हेही वाचा - जेव्हा पोटच्या गोळ्यांसह मातेचे मृतदेह दिसले पाण्यावर तरंगताना; शेतकऱ्यांना भरला थरकाप