नाशिक : मालेगाव  शहराजवळील चाळीसगाव फाट्यानजीकच्या लोणवाडे शिवारातील जीवनराम लेगा यांच्या मालकीच्या महालक्ष्मी ट्रान्सपोर्ट गुदामाला भीषण आग लागली. शुक्रवारी (ता.१७) सायंकाळी साडेपाचच्या सुमारास हा प्रकार घडला.

असे घडले सर्व..

आगीत सुमारे दीड कोटीचे नुकसान झाल्याचा अंदाज वर्तविण्यात येत आहे.
 लोणवाडे शिवारात लेगा यांचे ट्रान्सपोर्ट गोदाम आहे. गोदामाच्या दर्शनी भागात ट्रकमध्ये माल भरण्याचे काम सुरु होते. सायंकाळी पाठीमागील भागातून अचानक गोदामातून धूर निघू लागला. कामगारांच्या हा प्रकार लक्षात येताच त्यांनी महापालिका अग्निशामक दलाला माहिती कळविली. गोदामानजीकच तालुका पोलिस ठाणे असल्याने पोलिस तातडीने घटनास्थळी दाखल झाले. क्षणार्धात अग्निशामन अधिक्षक संजय पवार व सहकारीही अग्निशामक बंबासह दाखल झाले. महावितरणने परिसरातील वीजपुरवठा खंडीत केला. गोदामात सूत, पॉलिस्टर व सूत कॉईन्स असल्याने आगीने रौद्र रुप धारण केले. धूर व आगीचे लोळ सात किलोमीटर अंतरापर्यंत दिसून येत होते. आगीचे स्वरुप पाहुन अतिरिक्त बंब मागविण्यात आले. शुक्रवार असल्याने घटनास्थळी बघ्यांची मोठी गर्दी जमा झाली होती.

क्लिक करा > धक्कादायक! नशेत सैन्यदलाच्या जवानाकडून 'हे' काय घडले?

आगीत सुत कॉइन्स, पॉलीस्टर, ग्रे धागा, सूत, वीज उपकरणे, फर्निचर आदी कोट्यावधीचा ऐवज जळून खाक झाला. महापालिका अग्निशामक दलाच्या सर्व सात बंबांनी वीसपेक्षा अधिक फेऱ्या करुनही रात्री साडेआठपर्यंत आग आटोक्यात आलेली नव्हती. कामगार व काही मदत करणाऱ्या तरुणांनी गुदामातील माल बाहेर काढण्यासाठी मोठ्या प्रमाणावर मदत केली. गुदामाच्या पुढील भागात असलेला लाखो रुपयांचा माल वाचविण्यात यामुळे यश आले. आगीचे निश्‍चित कारण व नुकसानीचा अंदाज समजू शकला नाही. तालुका पोलिस ठाण्यात अद्याप नोंद झालेली नाही.

क्लिक करा > PHOTOS : शटरचा आवाज ऐकून 'त्याला' जाग आली..बघतो तर काय धक्काच....