Nashik News : हिमाचल प्रदेशातील मनालीजवळ असलेले समुद्रासपाटीपासून सुमारे १७ हजार ४०० फूट उंचावरील फ्रेंडशिप शिखर नाशिकच्या गिर्यारोहक मित्रांच्‍या चमूने सर केले आहे. बालपणीच्‍या चौघा मित्रांनी ही मोहीम यशस्‍वी करताना मैत्रीचा झेंडा शिखरावर फडकविला आहे.

मोहिमेत मिलिंद लोहोकरे, संदीप चाकणे, मानस लोहोकरे आणि योगेश गायकवाड यांच्‍यासह आदींचा समावेश होता. हे बालपणीचे मित्र आपल्या आपल्या वयाला हरवून मैत्रीचा वेगळा अर्थ शोधण्यासाठी मोहिमेत सहभागी झाले होते. (Friendship Shikhar Sir in Himachal Pradesh from childhood friends nashik)

‘फ्रेंडशिप पिक’ शिखरासाठी २८ जूनला सोलंग गावातून चढाईला त्‍यांनी सुरवात केली. २ जुलैला टीममधील सगळ्यात तरुण गिर्यारोहक मानस लोहोकरे याने समिट केले. मिलिंद लोहोकरे यांनी समिटच्या अगदी अलीकडे म्हणजे १७ हजार १०० फुटांपर्यंत यशस्वी मजल मारली.

तर संदीप चाकणे आणि योगेश गायकवाड यांनी १४ हजार फुटांपर्यंतची चढाई पूर्ण केली. अनेक गिर्यारोहण मोहिमा एकत्र केलेले ५६ वर्षांचे मिलिंद लोहोकरे आणि ५३ वर्षांचे चाकणे हे २५ वर्षांचा मानस लोहोकरे याला त्यातले आव्हान देत खुणावत होते.

हेही वाचा : Credit Card फसवणूक....काय घ्याल काळजी?

दरम्यान, योग्यप्रकारे व्हिडिओ डॉक्युमेंटेशन व्हावे, अशा प्रकारच्या मोहिमांमधील थरार, तयारी आणि इतक्या उंचावरील निसर्गाचे रूप या गोष्टी सामान्यांपर्यंत पोचविण्याच्‍या उद्देशाने योगेश गायकवाड मोहिमेत सहभागी झाले होते.

अशी होती आव्‍हाने..

कमी ऑक्सिजन पातळी, प्रचंड थंडी, मर्यादित संसाधने अशा प्रतिकूल परिस्थितीत चमूने मैत्रीचा अर्थ शोधत शिखर सर केले. वडील-मुलगा, बालपणीचे मित्र आणि व्यवसायानिमित्त झालेल्या मित्रांनी स्वतःच्या क्षमतेला आव्हान देत फ्रेंडशिप शिखर सर केले.