नाशिक : (घोटी) सततच्या भांडणाला कंटाळून तिने सासरी न जाण्याचा निर्णय घेतला होता. पतीचा मात्र वारंवार घेऊन जाण्याचा अट्टाहास. पहाटेच्या सुमारास दारू पिऊन तिच्या माहेरी तो गेला. रागाच्या भरात मारण्यासाठी तिच्या मागे पळत सुटला. तिच्या भावाला काही बघवेना. अन् नंतर घडले असे...

अशी घडली घटना

भरत रघुनाथ चव्हाण (वय 50) रा. इंदिरानगर, घोटी यांची बहीण लक्ष्मीबाई मोहिते हिचे नारायण साहेबराव मोहिते (वय 45) रा. चांदोरी ता. निफाड यांच्याशी लग्न झाले आहे. कौटुंबिक वाद व सततच्या भांडणामुळे लक्ष्मीबाई ही सासरी नांदायला जात नव्हती. शुक्रवारी (ता. 11) सायंकाळी पती नारायण हा तिला घरी घेऊन जाण्यासाठी आले होते. मात्र पतीसोबत जाण्यास तिने नकार दिल्याने पतीचा चांगलाच पारा चढला. रागारागात जाऊन पती नारायण हा मद्यपान करुन शनिवारी (ता. 12) पहाटे पुन्हा आला. बायकोला शिवीगाळ करुन मारण्यासाठी पुढे आला. त्यावर मेहुणा भरत याने मध्यस्ती केली. याचा फायदा घेत बायको लक्ष्मीबाई हिने पळ काढला. तिचा मागोवा घेत पती नारायण मोहिते कृषी उत्पन्न बाजार समितीच्या पाठीमागील आवारात पोहचले. 

बहिणीला वाचविण्याचा नादात भावाने झेलला वार

बहिणीच्या काळजीपोटी भरतदेखील मागेच गेला. नारायण मोहिते कृषी उत्पन्न बाजार समितीच्या पाठीमागील आवारात पोहचला. मेहुणा भरत दिसताच, 'तुझ्यामुळेच माझी बायको नांदायला येत नाही. तुला नाही सोडणार' म्हणत पती नारायण याने रागाच्या भरात भरत याच्या हातावर चाकूने वार करत पोट चाकू खुपसला. भरत रक्ताच्या थारोळ्यात पडून होता. स्थानिकांनी घटनेबाबत पोलिसांना कळविले.

हेही वाचा > ह्रदयद्रावक! मोबाईल मिळेना म्हणून भितीपोटी विद्यार्थीनीची आत्महत्या; ऑनलाइन शिक्षणाचा आणखी एक बळी

पोलीस ठाण्यात गुन्हा दाखल

घटनास्थळावरुन पळून जात असतांनाच नारायण याला अटक करण्यात आली. हातात चाकू घेऊन पळून जात असतांना पोलिसी पथकाने त्यास अटक केली. जखमी भरत चव्हाण यास तातडीने रुग्णवाहिका बोलावत ग्रामीण रुग्णालयात उपचारासाठी दाखल करण्यात आले. याबाबत पोलीस ठाण्यात गुन्हा दाखल करण्यात आला असून घटनेचा पुढील तपास सहाय्यक पोलीस निरीक्षक जालिंदर पळे यांच्या मार्गदर्शनाखाली उपनिरीक्षक संजय वाघमारे हे करत आहे.  

हेही वाचा > संतापजनक! कोरोनाबाधित महिलेचा सफाई कर्मचाऱ्याकडून विनयभंग; घटनेनंतर रुग्णालयात खळबळ

संपादन - किशोरी वाघ