नाशिक : घोटीकरांची पिण्याच्या पाण्याची समस्या सोडविण्यासाठी नवीन पाणीपुरवठा योजना मंजूर झाली. आवश्‍यक ती प्रक्रिया पूर्ण झाल्यानंतर आता या योजनेच्या अंतिम निर्णय मंत्रालयीन स्तरावर अडकला असल्याने या निर्णयाची प्रतिक्षा घोटीकरांना लागली आहे. (ghoti people water struggle Waiting for ministerial decision on water supply scheme nashik Latest Marathi News)

ऐन पावसाळ्यामध्ये घोटीकरांना पिण्याच्या पाण्यासाठी चार ते पाच दिवस वाट पाहण्याची वेळ आली आहे. शहराचा वाढता विस्तार, वाढलेली लोकसंख्या याचा ताण येथील जुन्या पाणीपुरवठा योजनेवर दिवसेंदिवस पडत आहे. यातच घोटी ही मोठी बाजारपेठ असल्याने येथे आजूबाजूच्या लोकसंख्येची वेगळीच भर पडत आहे. त्यामुळे सहा विभागांना पुरेसे पाणी देताना ग्रामपालिका प्रशासनाची चांगलीच दमछाकही होत आहे.

घोटीकरांची पाण्याची समस्या सोडविण्यासाठी लोकप्रतिनिधी आणि प्रशासन यांच्या पाठपुराव्यानंतर येथे सुमारे २० कोटी रुपयांची पाणीपुरवठा योजना मंजूर झाली आहे. यातून घोटीकरांची पाण्याची समस्या दूर होणार आहे. भावली धरणातून पाणी उचलून ते घोटीकरांसाठी उपलब्ध करून दिले जाणार आहे. सदर योजनेसाठी निविदा प्रक्रिया देखील राबविण्यात येऊन आवश्‍यक ती सर्व प्रक्रिया पूर्ण करण्यात आली आहे.

सदर योजना ही दोन कोटीहून अधिकची असल्याने याचा निर्णय हा मंत्रालयीन निविदा समितीकडून घेण्यात येत असतो. या समितीकडून ठेकेदार हे अंतिम झाल्यानंतर सदर कामाचे कार्यारंभ आदेश संबंधित ठेकेदार यांना दिले जातात.

परंतु सद्यःस्थितीत नवीन पाणीपुरवठा योजनेबाबत निविदा प्रक्रिया पूर्ण झाल्यानंतर ह्या कामाच्या मंजुरीसाठी मंत्रालयीन स्तरीय निविदा समितीकडे हा प्रस्ताव सादर करण्यात आलेला आहे. समितीकडून अद्याप योजनेच्या अंतिम मंजुरीबाबत निर्णय न झाल्याने पाणीपुरवठा योजनेच्या कामाला सुरवात झालेली नाही.

"घोटी येथील नवीन पाणीपुरवठा योजनेचे प्रस्ताव मंत्रालयीन निविदा समितीकडे आहे. समितीकडून निर्णय झाल्यानंतर संबंधित ठेकेदार यांना कामाचे कार्यारंभ आदेश दिले जातील."

- एस.एस.मोरे, कार्यकारी अभियंता, महाराष्ट्र जीवन प्राधिकरण