मालेगाव (जि. नाशिक) : शहरातील कोरोना रुग्णांची संख्या नियंत्रणात आली आहे. दुसऱ्या टप्प्यातील कोरोना हद्दपार करण्याकडे वाटचाल सुरू असतानाच गेल्या काही दिवसांपासून रुग्णसंख्या वाढत आहे. वाढती रुग्णसंख्या चिंतेचा विषय ठरू पाहत आहे. सध्या शहरात १५० रुग्णांवर उपचार सुरू आहेत. ग्रामीण भागात रुग्णसंख्या बऱ्यापैकी नियंत्रणात आल्याने सध्या वीस रुग्णांवर उपचार सुरू आहेत. 

शहरात कोरोनाने पहिल्या टप्प्यात थैमान घातले होते. विशेषत: येथील मुस्लिम बहुल पूर्व भागात रुग्णसंख्या सर्वाधिक होती. एप्रिल ते जून या काळात पहिल्या टप्प्यातील कोरोना रुग्ण आढळले. त्यानंतर पूर्व भागातून कोरोना जवळपास हद्दपार झाला. जुलैपासून शहरातील कॅम्प, संगमेश्‍वरच्या पश्‍चिम भागाला कोरोनाने विळखा घातला. सहा महिने झाले तरी हा विळखा कायम आहे. महापालिका हद्दीत सध्या १५० रुग्णांवर उपचार सुरू आहेत. गेल्या महिन्यात ही संख्या ७० पर्यंत खाली आली होती. पंधरा दिवसांपासून रुग्ण वाढत आहेत. महापालिकाहद्दीत आतापर्यंत चार हजार ५१८ कोरोना पॉझिटिव्ह रुग्ण आढळले. यात चार हजार १९४ रुग्ण पूर्णपणे बरे झाले. यातील १७४ जणांचा मृत्यू झाला. रुग्ण बरे होण्याचे प्रमाण ९२.८३ टक्के आहे. अद्याप १५३ अहवाल प्रलंबित आहेत. 

हेही वाचा - जेव्हा पोटच्या गोळ्यांसह मातेचे मृतदेह दिसले पाण्यावर तरंगताना; शेतकऱ्यांना भरला थरकाप

नियमांची ऐशीतैसी 

कोरोना संदर्भात प्रशासनाने घालून दिलेल्या नियमांची येथे सर्रास पायमल्ली केली जात आहे. शहरात केवळ दहा टक्के नागरिक मास्क वापरतात. सोशल डिस्टन्सिंगचा फज्जा उडाला आहे. शहर व ग्रामीण भागात लग्नसोहळ्यांची धूम आहे. कोरोना हद्दपार झाला, अशा अविर्भावात नागरिक वावरत आहेत. महसूल व पोलिस प्रशासनाकडून ठोस उपाययोजना केल्या जात नाहीत. वाढती रुग्णसंख्या चिंतेचा विषय आहे. ग्रामीण भागात रुग्णसंख्या २० पर्यंत खाली आली आहे. सध्या होणारे लग्नसोहळे व आगामी ग्रामपंचायत निवडणूक पाहता नागरिकांनी काळजी घेणे गरजेचे आहे अन्यथा कोरोनाचा फैलाव वाढू शकेल, अशी भीती व्यक्त होत आहे.  

हेही वाचा - वडिलांसोबतची लेकीची 'ती' ड्राईव्ह शेवटचीच; पित्याचा ह्रदय पिळवटून टाकणारा आक्रोश