नाशिक : कोवळ्या वयातच नियतीचे घाव झेलत शिक्षणाच्या स्वप्नांना हृदयात फुलविणाऱ्या तरुणाने अंथरुणाला खिळलेली आई...संधिवाताने त्रस्त वडील...वयोवृद्ध आजोबा आणि मोठा भाऊ या सर्वांची जबाबदारी पार पाडत अभियंता होण्याचे स्वप्न पूर्ण केले. कुटुंब हेच आपले विश्‍व समजून त्याने कर्तव्याला प्राधान्य दिले आहे. आई अंथरुणाला खिळलेली का असेना पण तिने जन्म दिला आहे याची कृतज्ञतापूर्वक परतफेड करण्याचे त्याने ठरविले आहे. 

आईच्या काळजीपोटी घरात बसूनच काम सुरू

सातपूर परिसरातील जाधव संकुल परिसरात राहणाऱ्या हेमंत माधव शिरोडे याची घरची परिस्थिती बेताचीच...आईच्या आजारपणामुळे स्वच्छंद व मनमुराद खेळायचा आनंद नियतीने नवव्या वर्षीच हिरावून घेतला. अंगी अगदी साधेपणा असलेला हा मुलगा दहावीत 81 टक्के गुण मिळवून उत्तीर्ण झाला होता. अशातच अभियांत्रिकी महाविद्यालयात प्रवेश मिळाला. महाविद्यालय सुरू असताना घरातील कामे आणि अभ्यास या दुहेरी मालिकेत त्याने कधीही हार मानली नाही. घरातील कामे आटोपून तो दिवसाआड महाविद्यालयात जात असे. जिद्द व चिकाटीच्या जोरावर बीई कॉम्प्युटरमध्ये 72 टक्के गुण मिळवून उत्तीर्ण झाला. आईच्या काळजीने त्याला कुणाशी मैत्रीचे ऋणानुबंधही निर्माण करता आले नाहीत. चांगल्या गुणांनी उत्तीर्ण झालेल्या हेमंतने आईच्या काळजीपोटी बाहेर नोकरी न करता घरात बसूनच वेब डिझायनिंगचे काम सुरू केले आहे. 

असा आहे हेमंतचा दिनक्रम 

आईच्या प्रातर्विधीपासून तिला अंघोळ घालणे, घरातील सर्वांसाठी जेवण बनविणे, घरातील कामे आवरणे ही सर्व कामे एखाद्या गृहिणीप्रमाणे हा तरुण पंधरा वर्षांपासून करत आहे. आई, आजोबांना अंघोळ घालणे, वेळेवर जेवण, औषधे देणे अशी शुश्रूषा करतो. आई-वडील हे दैवत असल्याचे हेमंत आवर्जून सर्वांना सांगतो. 

 हेही वाचा > PHOTOS : दुर्दैवी घटना! पोलीस अधिकारीच्या गाडीचा अक्षरश: चेंदामेंदा..सुट्टीनिमित्त घरी जातानाच काळाचा घाला..पाहा

आई आजारी असल्यामुळे तिची काळजी घेणे जबाबदारीचे काम आहे. आयुष्यात पैसा कधीही कमावू शकतो. पण एकदा गेलेले आई-वडील पुन्हा कधी परत मिळविता येऊ शकत नाहीत. - हेमंत शिरोडे, अभियंता 

हेमंत घरातल्या सर्वांची काळजी घेतो. कधीही मुलीची उणीव जाणवू देत नाही. कपडे, भांडे, स्वयंपाकापर्यंतची सर्व कामे करून वेब डिझायनिंगचे काम करत आहे, याचा आम्हाला खूप अभिमान आहे. - माधव शिरोडे, वडील 

VIDEO : "मालेगावचा द्वेष करणारे आज शहरात कसे?" भर पत्रकार परिषदेत महापौरांकडून खासदारांचा निषेध...नेमके काय घडले?