नाशिक : कोरोना विषाणु संसर्गावर अद्यापपर्यंत औषध मिळाले नसल्याने प्रत्येकाला स्वत:सह इतरांची काळजी घ्यावी लागणार आहे त्यामुळे राज्य शासनाने माझे कुटूंब माझी जबाबदारी उपक्रम सुरु केला असून त्या अंतर्गत महापालिकेने गेल्या सहा दिवसात घरोघरी जावून केलेल्या तपासणी मध्ये दोन लाख तीस हजार नागरिकांची तपासणी केली. त्यात ३४४ कोरोना बाधित आढळल्याने उपक्रमाच्या माध्यमातून कोरोना साखळी खंडीत करण्यास मदत होत आहे. 

कोरोना संसर्ग वाढतं असल्याच्या पार्श्‍वभूमीवर राज्य शासनाने माझे कुटूंब माझी जबाबदारी ही मोहिम सुरु केली असून नाशिक महापालिकेत २५ ऑक्टोंबर पासून मोहिमेला सुरुवात करण्यात आली. ट्रेस, ट्रॅक व ट्रिट या त्रिसुत्री नुसार शहरातील प्रत्येक घरांमध्ये भेटी देवून तपासणी केली जात आहे. अतिजोखमीचे आजार असलेल्या रुग्णांची माहिती अॅप मध्ये भरून ॲपद्वारेचं उपचार पध्दती अवलंबिली जाणार आहे. मधुमेह, उच्च रक्तदाब, ह्दयविकार, किडनी आजार असल्यास त्यांचे समुपदेशन करून काळजी घेण्याबरोबरचं मास्क लावणे, गरज असेल तरचं घराबाहेर पडावे, दर दोन तासांनी हात स्वच्छ धुवावे, कपडे स्वतंत्रपणे धुवावे आदी विषयांवर जनजागृती देखील केली जात आहे.

कोरोनाची लक्षणे आढळलेल्या रुग्णांची तपासणी करून पॉझिटिव्ह आढळल्यास तत्काळ उपचार सुरु केले जात असल्याची माहिती पालिकेचे वैद्यकीय अधिक्षक डॉ. बापुसाहेब नागरगोजे यांनी दिली. मोहिमेसाठी महापालिकेने ७९४ पथके तयार केली असली तरी अंगणावाडी कर्मचायांनी काम करण्यास नकार दिल्याने ६३२ पथकांमार्फत काम सुरु आहे. आयुक्त कैलास जाधव यांनी नकार देणाऱ्यांवर कारवाईच्या सुचना दिल्यानंतर अंगणवाडी कर्मचायांनी कामास होकार दिला आहे. 

हेही वाचा > माजी सरपंचाच्या पुतण्याचा खून; नदीपलीकडे मृतदेह सापडल्याने परिसरात खळबळ

मोहिमेच्या पातळीवर 

- महापालिकेचे ७९४ पथके. 
- एका पथकाकडून दिवसभरात ५० घरांची तपासणी. 
- ५५ हजार ४१४ घरांना भेटी. 
- २ लाख ३० नागरिकांची आरोग्य तपासणी. 
- तपासणीत विविध आजारांचे ६०४ संशयित. 
- स्वॅब चाचणीनंतर ३५० रुग्ण आढळले कोरोना बाधित.

हेही वाचा > पोलिसांच्या नाकावर टिच्चून अवैधरित्या वाहतूक; औरंगाबाद-अहवा महामार्गावरील धक्कादायक प्रकार

संपादन - रोहित कणसे