Rain News : उत्तर महाराष्ट्रातील काही भागामध्ये शनिवारी (ता. १६) आणि रविवारी (ता. १७) जोरदार ते अतिजोरदार पावसाचा अंदाज हवामान विभागातर्फे वर्तविण्यात आला आहे.

इगतपुरीच्या ग्रामीण कृषी हवामान केंद्रातर्फे नाशिक जिल्ह्यातील घाट विभागात काही ठिकाणी मेघगर्जना, विजांचा कडकडाट आणि सोसाट्याच्या वाऱ्यासह जोरदार ते अतिजोरदार पाऊस होण्याची शक्यता वर्तविण्यात आली आहे. (Heavy rain forecast in North Maharashtra today and tomorrow news)

नाशिक जिल्ह्यात १८ ते २० सप्टेंबरला मध्यम पावसाची शक्यता आहे. आकाश पुढील पाच दिवस ढगाळ राहणार आहे. तापमान कमाल २७ ते ३१, किमान २० ते २२ अंश सेल्सिअस, तर वाऱ्याचा वेग तासाला १५ ते २० किलोमीटर राहील, असे केंद्रातर्फे स्पष्ट करण्यात आले आहे.

जोरदार पावसाचा अंदाज घेऊन शेतकऱ्यांनी पक्व खरीप पिकांची काढणी, कापणी करून सुरक्षित जागेवर ठेवावे अथवा कापलेल्या पिकांना ताडपत्रीने झाकून ठेवावे, असा सल्ला केंद्राच्या शास्त्रज्ञांनी दिला आहे.

खानदेशातील जिल्हानिहाय पावसाच्या अंदाजांची स्थिती अशी : धुळे : शनिवारी (ता. १६)-काही भागात जोरदार ते अतिजोरदार पाऊस, रविवारी (ता. १७)-काही भागात जोरदार पाऊस, सोमवारी (ता. १८) आणि मंगळवारी (ता. १९)-हलका ते मध्यम पाऊस.

हेही वाचा : Credit Card फसवणूक....काय घ्याल काळजी?

नंदूरबार : शनिवारी (ता. १६)-घाट भागातील काही ठिकाणी अतिजोरदार पाऊस, रविवारी (ता. १७)-मेघगर्जना, विजांचा कडकडाटासह जोरदार पाऊस, सोमवारी (ता. १८) आणि मंगळवारी (ता. १९)-मध्यम ते हलका पाऊस.

जळगाव : शनिवारी (ता. १६)-काही भागात मेघगर्जना, विजांचा कडकडाटासह जोरदार ते अतिजोरदार पाऊस, रविवारी (ता. १७)-मध्यम पाऊस, सोमवारी (ता. १८) आणि मंगळवारी (१९)-हलका ते मध्यम पाऊस.