Nashik News : शहरात अपघातांमध्ये दुचाकीस्वाराचा सर्वाधिक मृत्यू होत आहेत. या अपघाती मृत्यूला आळा घालण्यासाठी शहर वाहतूक शाखेकडून गेल्या आठवडाभरात विशेष मोहीम राबवीत विनाहेल्मेट, ट्रिपल सीट वाहनचालकांविरुद्ध ऑनलाइन दंडात्मक कारवाई करीत तब्बल १६ लाख २९ हजारांचा ऑनलाइन दंड वसूल आकारण्यात आला आहे.(Helmetless and triple seat driver against action by traffic police nashik news)

पोलिस आयुक्त संदीप कर्णिक, वाहतूक शाखेचे उपायुक्त चंद्रकांत खांडवी, सहाय्यक आयुक्त डॉ. सचिन बारी यांच्या उपस्थितीत झालेल्या अपघातांच्या आढावा बैठकित नाशिक शहर पोलिस आयुक्तालय हद्दीतील झालेल्या दुचाकी वाहनांचे अपघातांचा आढावा घेण्यात आला. जानेवारी २०२३ ते नोव्हेंबर २०२३ अखेर नाशिक शहरात एकूण ४२६ अपघात झाले असून, त्यापैकी ३३९ दुचाकीचालकांचा अपघात झाला आहे.

त्यामध्ये १०६ मयत व २६९ दुचाकीस्वार जखमी झालेले आहेत. शहरात वाढणाऱ्या रस्ते अपघातामध्ये होणारी जीवितहानी टाळण्यासाठी दुचाकीस्वारांनी हेल्मेट परिधान करणे बंधनकारक आहे. तसेच वाहनांवर ट्रिपल सीट प्रवास करू नये याकरिता शहर वाहतूक शाखेतर्फे वेळोवेळी कारवाई करण्यात येते.

परंतु विनाहेल्मेट दुचाकी चालविण्याच्या प्रमाणात घट न होता दुचाकी स्वाराच्या अपघातात वाढ होवुन दुचाकी वाहनचालक मयत होण्याच्या संख्येत वाढ झाल्याचे दिसून येते. शहर वाहतूक शाखेच्या युनिट १ ते ४ च्या कार्यक्षेत्रात गेल्या ७ ते १५ डिसेंबरदरम्यान विनाहेल्मेट व ट्रिपल सीट प्रवास न करण्यासाठी, तसेच विरुद्ध दिशेने वाहन चालविणे याविरुद्ध राबविण्यात आली.

त्यामध्ये शहर वाहतूक शाखा युनिट १ ते ४ मध्ये विनाहेल्मेट २ हजार २४४ कारवाई करीत ११ लाख २२ हजार दंड, तसेच ट्रिपल सीटच्या २१५ केसेस करून २ लाख १५ हजारांचा दंड तसेच विरुद्ध दिशेने वाहन चालविणे ६१३ केसेस करून ३ लाख ६ हजार ५०० रुपये असा एकूण १६ लाख २९ हजार २००-रुपये ऑनलाइन दंड आकारण्यात आलेला आहे.

युनिटनिहाय दंडात्मक कारवाई

युनिट......विनाहेल्मेट...राँगसाइड...ट्रिपल सीट...एकूण केसेस....दंड (रुपये)

युनिट-१....७००......२८......५४......७८२.....४,१८,०००

युनिट-२....६६२......४७९.....१०९.....१२५०....६,७९,५००

युनिट-३....५६६......३५......२४......६२५.....३,२४,२००

युनिट-४....३१६......७१......२८......४१५.....२,०७,५००

एकूण :....२२४४.....६१३.....२१५.....३०७२....१६,२९,२००

''दुचाकीस्वारांनी हेल्मेट परिधान करावे तसेच ट्रिपल सीट प्रवास करू नये. चुकीच्या दिशेने वाहन चालवू नये. नियमांचे उल्लंघन केल्यास दंडात्मक कारवाई केली जाईल.''- डॉ. सचिन बारी, सहायक आयुक्त, वाहतूक शाखा