नाशिक / मालेगाव : मालेगावचे एमआयएममचे आमदार मौलाना मुफ्ती मोहंमद इस्माईल यांना होम क्वारंटाइन राहण्याचा सल्ला महापालिका प्रशासनाने दिला आहे. गेल्या महिन्यात ते दिल्ली, आग्रा येथून परतल्याने खबरदारीचा उपाय म्हणून त्यांना हा सल्ला देण्यात आला.

त्यामुळे प्रशासनाला आज उपरती का सुचली?
दरम्यान आमदार मौलाना मुफ्ती इस्माईल गेल्या महिन्यात दिल्ली व आग्रा येथे गेले होते. त्यामुळे प्रशासनाला आज उपरती का सुचली? असा प्रश्न विचारला जात आहे. मुफ्ती यांनी दिल्लीहून परतल्यानंतर त्यांनी सभा घेतली. आयुक्त, अपर अधिक्षक आदींसह अनेकांच्या भेटीगाठी घेतल्या. सामान्य रुग्णालयात गर्दीने जाऊन गोंधळही घातला. दरम्यान, रुग्णालयातील गुन्ह्यात अटकपूर्व जामिनासाठी त्यांनी न्यायालयात अर्ज केला आहे. त्यामुळे होम क्वारंटाइन ही मौलाना मुफ्ती यांची नौटंकी असल्याचा आरोप माजी आमदार रशीद शेख यांनी केला आहे.आमदार मोलाना मुफ्ती त्यांची प्रकृती उत्तम असल्याचे डॉक्‍टरांनी सांगितले. या सल्ल्यानंतर शहरात वेगवेगळ्या चर्चां सुरु झाल्या आहेत. 

गोळीबारांचीही पोलिसांनी कसून चौकशी करावी

पोलिस व प्रशासन आमदार मौलाना मुफ्ती मोहंमद इस्माईल यांना पाठिशी घालत आहे. शासकीय कामात अडथळा आणल्याच्या गुन्ह्यात जामीन मिळविण्यासाठीच असल्याचे होम क्वारंटाइनचे नाटक आहे. महेशनगर पाठोपाठ मच्छीबाजार व फार्मसी कॉलेज परिसरात झालेल्या दोन्ही गोळीबारांचीही पोलिसांनी कसून चौकशी करावी. माहिती लपविणाऱ्या व गैरकृत्य करणाऱ्या लोकप्रतिनिधीला पाठीशी घालणे गैर आहे असे प्रतिपादन काँग्रेसचे माजी आमदार रशीद शेख यांनी येथे केले.

कोणाकोणाची वैद्यकीय तपासणी करणार - शेख
हजारखोली भागातील संपर्क कार्यालयात झालेल्या पत्रकार परिषदेत ते बोलत होते.  शेख म्हणाले, दिल्ली, आग्रा येथे जमियतचे कार्यालय तसेच अन्य कामासाठी गेलेल्या आमदार मौलाना मुफ्ती यांनी तेथून परतल्यानंतर विधानसभेच्या अधिवेशनातही भाग घेतला होता. मालेगावी परतल्यानंतर त्यांनी सभा घेतली. आयुक्त, अपर अधिक्षक, उपअधिक्षक आदींसह अनेकांच्या भेटीगाठी घेतल्या. सामुहिक नमाजपठण केले. सामान्य रुग्णालयात गोंधळ घातला. ही वस्तुस्थिती पाहता प्रशासन सर्व आमदार, सभेला उपस्थित नागरीक, संबंधित अधिकारी यासह कोणाकोणाची वैद्यकीय तपासणी करणार असा प्रश्न आहे

हेही वाचा > धक्कादायक! दाम्पत्य दिवसभर घरातच बसायचे अन् रात्री घराबाहेर फिरायचे...कस्तुरबा रुग्णालयातील नर्सचे इगतपुरी कनेक्‍शन..

संशयित राजरोस फिरत आहेत.
मच्छीबाजार व फार्मसी कॉलेज परिसरात झालेला गोळीबार सुपारी देऊन झाला होता की काय याची चौकशी झाली पाहिजे. सामान्य रुग्णालयातील गुन्ह्यात आमदार मौलाना मुफ्ती यांच्यावर शासकीय कामात अडथळा व दंगलीचा गुन्हा दाखल झाला आहे. यातील संशयित राजरोस फिरत आहेत. पोलिसांनी समान न्यायाने कारवाई करायला हवी.अशीही मागणी त्यांनी केली. 

हेही वाचा > लॉकडाउन दरम्यान पहाटे संशयास्पद कंटेनरला पोलीसांनी अडवला...झडती घेतली तेव्हा धक्काच!

डिस्टन्सिंग पाळावे, गर्दी टाळावी
कोरोना ही राष्ट्रीय आपत्ती आहे. मालेगावच्या हितासाठी आणि या आपत्तीला अटकाव करण्यासाठी नागरिकांनी घरातच थांबावे. अत्यावश्‍यक वस्तू वा औषधांच्या दुकानांत औषध खरेदी करण्यासाठी गेल्यानंतरही सोशल डिस्टन्सिंग पाळावे, गर्दी टाळावी,असे आवाहनही शेख यांनी नागीरकांना केले.