नाशिक : "लॉकडाउन'मुळे मुरबाडमध्ये (जि. ठाणे) अडकून असलेले मध्य प्रदेशातील शेकडो परप्रांतीय मजूर मुंबई- आग्रा महामार्गाने गुरुवारी (ता.23) मध्य प्रदेशच्या दिशेने निघाले होते. हे मजूर नाशिकमधील उड्डाणपुलावरून जात असताना मुंबई-नाका पोलिसांनी त्यांना अडवत 106 परप्रांतीयांची रवानगी आनंदवलीतील निवारा शेडमध्ये केली. 

पादचाऱ्यांची पोलिसांकडे विनवणी

कोरोनाचा प्रादुर्भाव वाढल्याने सहा आठवड्यांपासून राज्यात "लॉकडाउन' सुरू आहे. यामुळे ठिकठिकाणी लाखोंच्या संख्येने परप्रांतीय मजूर अडकून पडले आहेत. ठाणे जिल्ह्यातील मुरबाडमध्ये अडकून असलेल्या शेकडो मजुरांनी कुटुंबीयांसह मुंबई- आग्रा महामार्गाने मध्य प्रदेशच्या दिशेने पायी प्रवास सुरू केला. गुरुवारी दुपारी साडेचार-पाचच्या सुमारास मुरबाडहून निघालेले हे शेकडो परप्रांतीय नाशिक शहरातील महामार्गाच्या उड्डाणपुलावरून जात होते. मुंबई नाका पोलिसांना मोठ्या संख्येने परप्रांतीय महामार्गाने जात असल्याचे कळताच त्यांना उड्डाणपुलावर रोखले. ते मुरबाडहून मध्य प्रदेशकडे जात असल्याचे सांगितले. तसेच, जाण्यासाठी त्यांनी पोलिसांकडे विनंतीही केली. उपायुक्त अमोल तांबे यांनीही घटनास्थळी भेट दिली. 

ट्रकचालकांकडून वाहतूक
 
मुंबईकडून परराज्यात निघालेल्या परप्रांतीयांना ट्रकचालक थेट पोचविण्याचे आश्‍वासन देतात. मात्र नाशिकच्या चेकपोस्टच्या अलीकडेच त्यांना उतरवून शहर ओलांडून येण्याचे सांगतात. त्यानुसार हे परप्रांतीय शहरातून जात होते. त्यामुळे अजूनही ट्रकचालकांकडून अडकून असलेल्या परप्रांतीयांची अनधिकृतरीत्या प्रवासी वाहतूक केली जात असल्याचे समोर आले आहे. 

हेही वाचा > कोरोनाबाबत खोडसाळपणा करणाऱ्यांवर होणार कारवाई; आयुक्तांचा इशारा

मुरबाड परिसरातून हे परप्रांतीय मध्य प्रदेशच्या दिशेने पायी निघाले होते. ही बाब लक्षात येताच त्यांना ताब्यात घेत त्यांची रवानगी आनंदवलीच्या निवारागृहात करण्यात आली आहे. - अमोल तांबे, पोलिस उपायुक्त, नाशिक 

हेही वाचा > जागतिक पुस्तक दिन : स्मार्टफोनमध्ये हरविलेल्या पिढीला पुस्तकात दडलेली माणसे भेटतील का?