नाशिक : पावसामुळे शहरात जागोजागी खड्डे पडले असून, रस्त्यांच्या गुणवत्तेचे पितळ उघडे पडले आहे. महापौर कार्यालयाकडे तक्रारी आल्यानंतर महापौर सतीश कुलकर्णी यांनी सार्वजनिक बांधकाम विभागाच्या अधिकाऱ्यांची बैठक घेऊन आढावा घेतला. गणपती विसर्जनाच्या आत रस्ते खड्डेमुक्त करण्याच्या सूचना त्यांनी केल्या. 

महापौर कुलकर्णी यांच्या बांधकाम विभागाला सूचना 

आठ-दहा दिवसांपासून रिपरिप सुरू असल्याने रस्त्यांवर पाणी साचून खडी व डांबर बाजूला पडले आहे. महत्त्वाच्या रस्त्यांवर खड्डे पडल्याने वाहनधारकांना कसरत करावी लागत आहे. अनेक ठिकाणी अपघात होत आहेत. यासंदर्भात महापौर कार्यालयाकडे अनेक तक्रारी प्राप्त झाल्याने महापौर कुलकर्णी यांनी अधिकाऱ्यांची बैठक घेतली. आठवडाभरात रस्त्यांवरील खड्डे तातडीने खडी व मुरुम टाकून खड्डे रोडरोलरने बुजविण्याचे आदेश सार्वजनिक बांधकाम विभागाला दिले. 

हेही वाचा > भरचौकात 'त्याने' थेट वाहतूक पोलिसाच्याच श्रीमुखात भडकावली...नेमके काय घडले?

सार्वजनिक बांधकाम विभागानेही खड्डे खडी व मुरुमाच्या सहाय्याने बुजवण्याचे काम तातडीने सुरू करणार असल्याचे मान्य केले. बैठकीला सभागृहनेते सतीश सोनवणे, भाजप गटनेते जगदीश पाटील, स्थायीचे माजी सभापती संजय बागूल, शहर अभियंता संजय घुगे, कार्यकारी अभियंता उदय धर्माधिकारी, आर. एस. पाटील आदी उपस्थित होते.

हेही वाचा > पहाटेची वेळ...मंदिरात आश्रयाला थांबलेले गुराखी दुर्गंधीने अस्वस्थ; शोध घेताच बसला धक्का

संपादन - किशोरी वाघ