जुने नाशिक : डिंगर अळी परिसरातील घर नंबर २३२२ जोशी वाडा गुरुवारी (ता. २०) रात्री नऊला कोसळला. अनेक वर्षापासून वाडा बंद असल्याने वाड्यात कुणीही राहत नव्हते. परंतु, वाडा परिसरात रस्त्यावर खेळणारे दोन चिमुकले थोडक्यात बचावले. वाड्यास लागून असलेल्या रस्त्यावर दोन लहान मुले खेळत होती. वाड्याची माती पडत असल्याचे लक्षात आल्याने दोघांनी तेथून पळ काढताच क्षणात वाडा कोसळला. त्यामुळे दोघेही थोडक्यात बचावले. (Joshi Wada collapsed in Dingar Ali area Nashik Latest Marathi News)

महापालिका पश्चिम विभाग कर्मचाऱ्यांना माहिती मिळताच अरुण मोरे यांच्यासह अन्य कर्मचाऱ्यांनी घटनास्थळाची पाहणी केली. रस्त्यावर पडलेला वाड्याचा काही प्रमाणात मलबा बाजूला केला. रात्रीमुळे अरुंद भागात जेसीबी घटनास्थळी जाणे शक्य नसल्याने कामात अडचण येत होती. त्यामुळे रस्त्यावरील पूर्ण मलबा उचलणे कर्मचाऱ्यांना शक्य झाले नाही. त्यामुळे मलबा हटविण्याचे काम थांबविले. याशिवाय वाड्याचा बहुतांशी भाग धोकादायक झाला आहे. तोही भाग कोसळण्यापूर्वीच उतरवून घेणे आवश्यक आहे.