Nashik News : एप्रिलच्या पहिल्या आठवड्यापासून तीव्र उन्हाचा तडाखा बसू लागला आहे. त्यामुळे बुधवारच्या आठवडे बाजारातून पालेभाज्यांच्या दरांत मोठी वाढ झाली आहे. (Leafy vegetables become expensive due to scorching summer nashik news)

इतर भाज्यांच्या दरातही वाढ झाल्याने आता गृहिणींचे भाजीपाल्याचे बजेट वाढण्याची चिन्हे आहेत. गत महिन्यापासूनच उन्हाची तीव्रता वाढली असून दुपारनंतर रस्त्यांवर शुकशुकाट होत आहे.

उन्हाच्या तीव्रतेचा परिणाम भाजीपाल्यावरही होऊ लागला असून मेथी, कोथिंबीरसारख्या पालेभाज्यांच्या आवकेत मोठी घट झाली आहे. त्यामुळे मेथीच्या जुडीसाठी तीस ते चाळीस रुपये मोजावे लागत होते. गावठी कोथिंबीर गायब झाली असून चायनीज कोथिंबिरीच्या छोट्या जुडीसाठी चाळीस ते पन्नास रुपये मोजावे लागत होते.

इतर भाज्यांत वांगी चाळीस ते पन्नास रुपये, बटाटे वीस, भेंडी चाळीस ते साठ, टोमॅटो चाळीस रुपये, हिरवी मिरची चाळीस रुपये किलो दराने उपलब्ध होते. याशिवाय कोबी, फ्लॉवरचा गड्डा पंधरा ते वीस रूपयांत उपलब्ध होता. याशिवाय कारली, गिलके चालीस रुपये किलो दराने उपलब्ध होती. एप्रिलच्या सुरवातीपासूनच उन्हाची तीव्रता वाढली आहे.

हेही वाचा : What Is Moksha: ‘अण्णा तुमच्या गुरूला मिळाला का मोक्ष?’

त्यामुळे दुपारी बारानंतर मेनरोड, कानडे मारुती लेन, शालिमार, रविवार पेठ या शहारातील मुख्य बाजारपेठेत शुकशुकाट जाणवत आहे. या उन्हाचा चटका आज आठवडे बाजारालाही बसला, दुपारी बारानंतर तीनपर्यंत अनेक विक्रेते ग्राहकाच्या प्रतीक्षेत होते.

कांदा बारा ते पंधरा रुपये किलो

बुधवारच्या आठवडे बाजारात लहान आकाराचा उन्हाळी कांदा दहा रुपये किलो तर मोठ्या आकाराचा कांदा पंधरा रुपये किलो दराने उपलब्ध होता. दहा किलो कांदे एकदम खरेदी केल्यास त्यासाठी बारा ते पंधरा रुपये दर होता. मसाले व वेफर्स करण्यासाठी महिलांची कांदा व बटाटे खरेदीस मोठी पसंती होती.