नाशिक : (पिंपळगाव बसवंत) नाशिक जिल्ह्यात पशुधन वाढत असले तरी त्या तुलनेत दवाखाने वाढत नसल्याने, तसेच शहरात तर पशुवैद्यकीय केंद्राला इमारत नसल्याने पशुधनाचे आरोग्य रामभरोसे आहे. जिल्ह्यात मागील दहा वर्षांत एकाही पशुवैद्यकीय केंद्राची निर्मिती झालेली नाही. तसेच श्रेणी दोनमधून एकमध्ये रुपांतरासाठी शासनदरबारी अद्यापही ३५ प्रस्ताव लाल फितीत अडकून पडले आहेत.

अतिरिक्त ताण संबंधित विभागावर
 
जिल्ह्यात मोठ्या संख्येने असलेल्या पशुधनाला दवाखान्यांमार्फत आरोग्यसेवा पुरविली जात आहे. या दवाखान्याची संख्या वाढवावी, यासाठी नाशिक जिल्हा परिषदेचा पाठपुरावा सुरू आहे. यासह श्रेणी बदलाचे प्रयत्नांना अद्याप यश आलेले नाही. त्यातच अपुऱ्या पशुधनावर उपचार केले जात आहेत. नियमित उपचाराबरोबर लसीकरणाची मोहीमही राबविण्यात नाशिक जिल्हा आघाडीवर आहे. पावसाळ्यात उद्‍भवणारे साथीचे आजार रोखण्यासाठी जिल्हा परिषदेच्या पशुसंवर्धन विभागातर्फे लसीकरण करण्यात आले आहे. जिल्ह्यात घटसर्प, फऱ्या आदी आजारांचे शंभर टक्के लसीकरण पूर्ण झाल्याचाच दावा विभागाने केला आहे. मात्र पशुवैद्यकीय केंद्र आणि अधिकारी-कर्मचाऱ्याच्या अपुऱ्या संख्येमुळे हे काम करताना अतिरिक्त ताण संबंधित विभागावर येत आहे. 

३५ केंद्रांना श्रेणी दोनमधून एकमध्ये रुपांतराची प्रतीक्षा 

जिल्ह्यात अधिक असलेल्या गावातील पशुधनाचे आरोग्य श्रेणी दोनच्या भरवशावर आहे. पशुधन पर्यवेक्षकांच्या माध्यमातून उपचार केले जातात. पण गंभीर दुखापत, आजार असेल तर शहराकडे धाव घ्यावी लागते. त्यात जनावराचा जीवही दगावण्याची भीती वेगळीच. जिल्हा परिषद आरोग्य विभागाने जिल्ह्यातील ३५ पशुवैद्यकीय दवाखान्यांची श्रेणी दोनमधून एक करण्यासाठी शासनदरबारी प्रस्ताव दिले आहेत. पण ते गेली पाच वर्षांपासून धूळ खात पडून आहेत. श्रेणी बदलल्यास पशुधन विकास अधिकारी मिळणार असून, शस्त्रक्रियेसह गंभीर आजारावर उपचार होऊ शकतील. 

पिंपळगाव बसवंत इमारतीचे घोंगडे भिजत 

पिंपळगाव बसवंत शहरातील पशुवैद्यकीय केंद्रांवर दोन हजारांहून अधिक पशुधनाच्या आरोग्याची जबाबदारी आहे. श्रेणी एकच्या या केंद्राला अद्याप इमारत नाही. शहरापासून दूर असलेल्या एका पडक्या इमारतीत केंद्रांचा कारभार सुरू आहे. जागेअभावी नव्या इमारतीचे घोंगडे भिजत पडले आहे. 

जिल्ह्यात एकूण पशुवैद्यकीय केंद्र 

श्रेणी १ - १३३ 
श्रेणी २ - ११० 
मंजूर पदे पशुधन विकास अधिकारी (गट ‘अ’ व ‘ब’) : १२५ 
कार्यरत पदे : ७८ 
रिक्त पदे : ४७ 

हेही वाचा >दुर्दैवी! बैलपोळ्याच्या पूर्वसंध्येला अचानक आलेल्या 'त्या' बातमीने ममदापूर हळहळले..काय घडले नेमके?

जिल्ह्यातील पशुधन 

गाय : दहा लाख सहा हजार ५५२ 
म्हैस : दोन लाख ३० हजार ७६१ 
शेळ्या : पाच लाख ७८ हजार ३१८ 
मेंढ्या : तीन लाख ५९ हजार ४१३  

हेही वाचा > धाबे दणाणले! नियुक्ती होऊनही उमेदवार कामावर नाही?कारवाई तर होणारच

(संपादन - किशोरी वाघ)