नाशिक  : कुस्त्यांचा आखाड्यात आपल्या कुशलतेने व चपळाईने प्रतिस्पर्ध्यावर विजय मिळवून तीनदा महाराष्ट्र चँपियन झालेली नाशिकची महिला कुस्तीपटू सुप्रिया तुपे हिने दहावीच्या बुधवारी जाहीर झालेल्या निकालात ८८ टक्के मिळवून दहावीच्या निकालाचा आखाडा गाजविला. 

अभ्यासाबरोबर कुस्त्यांची आवड जोपासत आहे

बेलू (ता. सिन्नर) गावातील सुप्रियाला लहानपणापासूनच कुस्त्यांची आवड असल्याने ती या खेळाकडे आकर्षित झाली. वडील बहिरू तुपे लष्करातील सेवा करत असल्याने तिचे वेगवेगळ्या शाळांमध्ये सुरवातीचे शिक्षण झाले. त्यांची सेवा पूर्ण झाल्यानंतर सुप्रियाने देवळाली कॅम्प येथील वासुदेव अथणी इंग्लिश मीडियम स्कूलमध्ये ॲडमिशन घेतले. तेथील शिक्षकांच्या मार्गदर्शनाखाली तिने शालेय अभ्यासाबरोबर कुस्त्यांची आवड जोपासत आहे.

हेही वाचा > घरखर्च भागविण्यासाठी वडिलांसोबत लावले पिको-फॉल...भाग्यश्रीच्या यशाने आईच्या कष्टाला कोंदण! 

८८ टक्के गुण मिळवून प्रथम श्रेणीत उत्तीर्ण

शालेय स्तरावरील कुस्त्यांमध्ये तिने सहभाग नोंदवीत शाळेला कुस्तीमध्ये पदके मिळवून दिली. तीन वेळा महाराष्ट्र चँपियन ठरली. यात शाळेच्या मुख्याध्यापिका, क्रीडाशिक्षक व विषय शिक्षकांचे सहकार्य मिळाले. कुस्ती स्पर्धेत गाजविलेल्या कामगिरीमुळे सुप्रियाला पोलिस आयुक्त विश्वास नांगरे-पाटील यांच्या हस्ते सन्मानित करण्यात आले होते. वडिलांच्या मार्गदर्शनाखाली तिने सराव केला. मात्र दहावीचे बोर्डाचे महत्त्वाचे वर्ष असल्याने तिने दुसऱ्या सत्रापासून अभ्यासाकडे लक्ष केंद्रित केले. ८८ टक्के गुण मिळवून ती प्रथम श्रेणीत उत्तीर्ण झाली. या यशाचे श्रेय शाळेतील सर्व शिक्षक, आई-वडील व बहिणीचे असल्याचे सुप्रियानेसकाळ ला सांगितले. 

हेही वाचा > झोळीत असतानाच नियतीने हिरावले पितृछत्र...आज त्याच लेकीच्या यशाने माऊलीच्या होते डोळ्यात आनंदाश्रू

रिपोर्ट - वाल्मिक शिरसाट 

संपादन - ज्योती देवरे