विंचूर (जि. नाशिक) : रात्री मुसळधार पाऊस सुरू असताना अचानक पाण्याचा जोरदार लोंढा आला आणि झोपड्यांमध्ये घुसला, मात्र समयसूचकता दाखवत मजूर कुटूंबे संसार सोडून पळत सुटले, संसार वाहून गेला असला तरी सुदैवाने सर्वांचा जीव मात्र वाचला. पावसामुळे काल रात्रीच्या सुमारास विंचूर ग्रामपालिकेचा जुना पाणीपुरवठा बंधारा फुटल्याने बंधाऱ्या लगतच्या पंधरा कुटुंबांवर मोठे संकट कोसळले होते, मात्र त्यातून ते बचावले.

मजूरांच्या झोपड्या गेल्या वाहून

मुसळधार पावसामुळे विंचूर व लासलगाव परिसरातील नद्यानाले, दुथडी भरुन वाहत होते. पाण्याचा प्रवाहाचा वेग इतका प्रचंड होता, की त्याने लासलगाव येथील प्रतापसागर हा बंधारा फुटला. हा पाण्याचा लोंढा मोठ्या प्रमाणावर विंचूरच्या बंधाऱ्यात आल्याने विंचूरचा जुना पाणीपुरवठा बंधाराही फुटला. बंधाऱ्यालगत पंधरा ते सोळा कुटुंबांची वस्ती आहे. या वस्तीवरील मजूर झोपलेले असतांना रात्री दहाच्या सुमारास फुटलेल्या बंधाऱ्याचे पाणी अचानक मजूरांच्या वस्तीमध्ये घुसल्याने मजूर जागे झाले अन जीव घेऊन पळाल्याने जीव वाचला. मात्र झोपड्यांमध्ये असलेले अन्नधान्य, भांडे, गँस, दूरदर्शन संच, भ्रमणध्वनी, कपडे, आदी संसार उपयोगी साहित्यांंसह झोपड्या वाहून गेल्याने मजूरांचे संसार उघड्यावर पडले आहेत.

शेतीमालाचे मोठ्या प्रमाणावर नुकसान

सोमेश्वर दरेकर या शेतकऱ्यांचे वीस फूट रुंद व तीस फुट लांबीचे पत्र्याचे शेडही या पुराच्या पाण्यात वाहून गेले. या शेडमध्ये देखील सोमेश्वर दरेकर यांच्याकडे कामास आलेले मजूर झोपलेले होते. मात्र त्यांना पुराच्या पाण्याचा अंदाज आल्याने त्यांनी वेळीच मजूरांना सुरक्षित स्थळी हलविल्याने पुढील अनर्थ टळला. बऱ्याच शेतकऱ्यांच्या शेतात पुराचे पाणी घुसल्याने शेतकऱ्यांच्या द्राक्षबागा, कांदा, मका, सोयाबीन आदी शेतीमालाचे मोठ्या प्रमाणावर नुकसान झाले आहे.