नाशिक : (मालेगाव) कोरोनाचा प्रादुर्भाव व प्रसार रोखण्यासाठी आरोग्य प्रशासन, बाधित रुग्ण तसेच त्यांच्या क्वारंटाइन केलेल्या नातेवाइकांची विशेष काळजी घेतली जात आहे. या कामात येणाऱ्या प्रशासकीय बाबींची पूर्तता व अडचणींचे नियंत्रण करण्यासाठी येथील प्रत्येक रुग्णालयात दोन याप्रमाणे 14 अधिकारी नियुक्त करण्यात आल्याचे इमर्जन्सी ऑपरेशन सेंटरचे प्रमुख डॉ. पंकज आशिया यांनी सांगितले. 

दोन शिफ्टमध्ये चालणार अधिकाऱ्यांचे कामकाज

रुग्णालयातील कामकाज सुरळीत सुरू आहे की नाही. वैद्यकीय अधिकारी व कर्मचारी नेमणुकीच्या ठिकाणी वेळेवर उपस्थित आहेत की नाही, त्यांना येणाऱ्या अडचणींसह प्रशासकीय बाबींची पूर्तता व रुग्णांच्या अहवालासह त्यांच्यामध्ये समन्वय ठेवण्याबरोबरच रुग्णालयातील संपूर्ण कामकाजावर सनियंत्रण करण्यासाठी हे अधिकारी नियुक्त करण्याच्या सूचना जिल्हाधिकारी सूरज मांढरे यांनी दिल्यानंतर या नियुक्‍त्या करण्यात आल्या. बडी मालेगाव, मन्सुरा, जीवन, फरानी हॉस्पिटल, आयएचएसडीपी, या. ना. जाधव हायस्कूल, जाट मंगल कार्यालय, चाळीसगाव फाटा, मालेगाव या सातही ठिकाणी दोन शिफ्टमध्ये या 14 अधिकाऱ्यांची नियुक्ती असेल. 

हेही वाचा > धक्कादायक! टेम्पोवर बोर्ड अत्यावश्यक सेवेचा...अन् आतमध्ये मात्र भलतंच

या अधिकाऱ्यांपैकी जबाबदारीत कोणीही हलगर्जी केल्यास संबंधितांविरुद्ध आपत्ती व्यवस्थापन कायदा 2005 साथरोग प्रतिबंध कायद्यान्वये कार्यवाही करण्यात येईल, असेही आदेशात नमूद करण्यात आले आहे.

हेही वाचा > रंगात आला डाव...पण पोलिसांना बघून टांगा पलटी घोडे फरार...अन् मग चांगलीच झाली फजिती!