Maratha Reservation : मराठवाड्यात कुणबी नोंदी शोधण्यासाठी मोहीम राबविली जात आहे. याच धर्तीवर नाशिक जिल्ह्यातही अशा प्रकारचीच मोहीम राबविण्यास सुरवात झाली आहे.

यात जिल्हा परिषदेच्या ग्रामपंचायत आणि शिक्षण विभागातील शाळांकडूनही कुणबी नोंदी शोधमोहीम सुरू आहे. दोन दिवसांत दोन्ही भागांत झालेल्या तपासणीत १९४८ पूर्वीच्या व १९४८ ते १९६७ या कालावधीतील एकूण आठ हजार नोंदी सापडल्या आहेत. (Maratha Reservation Gram Panchayat Education Department found 8 thousand Kunbi records nashik news)

अंतरवली सराटी येथील मनोज जरांगे-पाटील यांच्या उपोषणानंतर कुणबी जातीचे पुरावे तपासणीसाठी राज्यभर ‘मिशन मोड’वर प्रक्रिया राबविण्याचे निर्देश मुख्यमंत्री एकनाथ शिंदे यांनी दिले आहेत. या आदेशानंतर नाशिकमध्ये जिल्हा आणि तालुकापातळीवर समिती स्थापन करण्यात आली आहे.

जिल्ह्यात सर्व उपविभागीय अधिकारी, तहसीलदारांनी त्यांच्या कार्यक्षेत्रातील मराठा-कुणबी नोंदी शोधण्यासाठी विशेष मोहीम हाती घेतली आहे. जिल्हाधिकारी कार्यालयात यासाठीचा विशेष कक्ष स्थापन करण्यात आला आहे. जिल्हा आणि तालुका पातळीवर यासाठी समित्या स्थापन करण्यात आल्यानंतर समितीच्या कामकाजाला सुरवात झाली आहे. जिल्हा परिषदेच्या ग्रामपंचायत व प्राथमिक शिक्षण विभागानेही यात सहभागी व्हावे, अशा सूचना मुख्य कार्यकारी अधिकारी आशिमा मित्तल यांनी दिल्या.

याबाबत श्रीमती मित्तल यांनी ग्रामपंचायतीच्या उपमुख्य कार्यकारी अधिकारी वर्षा फडोळ, प्राथमिक शिक्षणाधिकारी नितीन बच्छाव, तालुका गटविकास अधिकारी, गटशिक्षणाधिकारी, मुख्याध्यापक, ग्रामसेवक यांची व्हिडिओ कॉन्फरन्सद्वारे बैठक घेतली. यात शाळा व ग्रामपंचायतींतून नोंदी शोधण्यात याव्यात, असे निर्देश दिले.

याबाबतचा अहवाल तत्काळ सायंकाळी पाठविण्यात यावा, अशाही सूचना देण्यात आलेल्या आहेत. त्यानुसार अहवाल प्राप्त होत आहे. दोन दिवसांच्या १३ तालुक्यांतून प्राप्त झालेल्या अहवालानुसार सात हजार ७१४ नोंदी सापडल्या आहेत. निफाड व इगतपुरीचा अहवाल रात्री उशिरापर्यंत प्राप्त झालेला नव्हता.

तालुकानिहाय प्राप्त झालेल्या नोंदी

मालेगाव (दोन हजार ४२४), सिन्नर (४९४), देवळा (८९), चांदवड (७१), त्र्यंबकेश्वर (५०), दिंडोरी (दोन हजार ४८३), सटाणा (५८०), येवला (एक हजार ३७), पेठ (०), सुरगाणा (०), नांदगाव (४०), नाशिक (४४६), कळवण (०).