नाशिक : कोरोनामुळे हैराण झालेल्या नाशिककरांना आता कुठे कोरोनातून सुटका होत असल्याचे वाटत असतांनाच कोविड सेंटरची जबाबदारी असलेल्या प्रमुखांकडून सुलतानी संकट उभे केले जात आहे. त्यात रुग्ण किंवा महापालिकेला कुठलाही फायदा नसून ठेकेदाराला चहा, नाश्‍ता पुरविण्याचे भक्कम बिल काढता यावे म्हणून कोरोना रुग्णांचा मुक्काम सातऐवजी १५ दिवस वाढविण्याची अजब शक्कल लढविली जात असल्याचा प्रकार वैद्यकीय अधीक्षकांच्या पाहणीत आढळून आला आहे. त्यामुळे आतापर्यंत दाखल झालेल्या कोरोना रुग्णांचा दाखल होण्याचा कालावधी तपासून पाहिला जाणार आहे. 

वैद्यकीय विभागाकडे आल्या तक्रारी

कोरोनाची सौम्य लक्षणे असलेल्या रुग्णाला सात दिवस, मध्यम लक्षणे असल्यास दहा दिवस तर गंभीर लक्षणे असलेल्या रुग्णाला रुग्णालयात दाखल केले जाते. त्यासाठी राज्य शासनाने नियमावली आखून दिली आहे. कोविड सेंटरमध्ये दाखल झालेल्या रुग्णांना चहा, नाश्ता, दोन वेळचे भोजन महापालिकेकडून दिले जाते. यासाठी प्रतिरुग्ण, प्रतिरोज १३५ रुपये भोजन पुरवठा करणाऱ्या ठेकेदाराला अदा केला जातात. रुग्णवाढीचा वेग अधिक होता. यावेळी ठेकेदारांना भोजन देण्यासाठी वेळ नसायचा, अशी परिस्थिती होती. परंतु आता रुग्णसंख्या झपाट्याने कमी होत आहे. त्यामुळे नवीन बिटको, ठक्कर डोम व मेरी येथील कोविड सेंटर ओस पडत आहेत. रुग्णसंख्या कमी होत असताना भोजन पुरवठादार ठेकेदारांनी वेगळे गणित मांडण्यास सुरवात केली असून, त्यात सात दिवसांचे रुग्ण असले तरी त्यांना पंधरा दिवस सेंटरमध्ये ठेवले जात असल्याच्या तक्रारी पालिकेच्या वैद्यकीय विभागाकडे प्राप्त झाल्या आहेत. 

रुग्णाची दाखल तारीख आणि डिस्चार्ज तारखेची पडताळणी होणार

प्राप्त तक्रारींच्या अनुषंगाने बिटको व ठक्कर डोम कोविड सेंटरमध्ये वैद्यकीय विभागाने तपासणी केली. ठक्कर डोम येथील सेंटरमध्ये कोविड सेंटरप्रमुख डॉ. राजेंद्र भडांरी यांनी चुकीची माहिती दिली. तर बिटको रुग्णालयात सौम्य लक्षणे असूनही रुग्णांना अधिक काळ रुग्णालयात ठेवण्यात आले. प्राथमिक तपासणीत ठेकेदारांना कोविड सेंटरप्रमुख सहभागी असल्याचे आढळून आल्याने आता वैद्यकीय विभागाने दोन महिन्यांचा कोविड सेंटरमधील डिस्चार्जचा लेखाजोखा मागितला आहे. रुग्ण दाखल झाल्याचा दिनांक व डिस्चार्ज दिल्याचा दिनांक तपासला जाणार आहे. यात रुग्णाची दाखल तारीख आणि डिस्चार्ज दिल्याच्या तारखेची पडताळणी केली जाणार आहे. यात दोष आढळून आल्यास कारवाई केली जाणार आहे. 

हेही वाचा > माहेरहून सासरी निघालेली विवाहिता चिमुकलीसह प्रवासातच गायब; घडलेल्या प्रकाराने कुटुंबाला धक्काच

रुग्णांना उपचारानंतर सोडून देण्यासाठी नियमावली आहे. त्याचे पालन होत नसल्याच्या तक्रारी आल्यानंतर तपासणी केली असता त्यात तथ्य आढळून आले. त्यानुसार आता तीन महिन्यांचे रेकॉर्ड तपासून पाहिले जाणार असून, त्याचा अहवाल वरिष्ठांना सादर केला जाईल. - डॉ. बापूसाहेब नागरगोजे, वैद्यकीय अधीक्षक, महापालिका  

हेही वाचा > नियतीची खेळी! एका मित्राला लागली हळद ,तर दुसऱ्याला दिला अग्नि; अक्षयच्या अवेळी जाण्याने परिसरात हळहळ