नाशिक : एका पोलिस शिपायाने अल्पवयीन मुलीचे अपहरण केल्याचा धक्कादायक प्रकार उघडकीस आला असून रक्षकच बनला भक्षक असे चित्र नाशिकमध्ये समोर आले आहे. जर पोलीसाकडूनच असा प्रकार घडला तर महिलेची सुरक्षितता वाऱ्यावर आहे. काय घडले नेमके?

रक्षकच बनला भक्षक! नाशिकमधील धक्कादायक प्रकार

उपनगर पोलिस ठाण्यात पोलिस शिपाई म्हणून कार्यरत असलेला दीपक जठार पंचवटी परिसरातील एका अल्पवयीन मुलीला रविवारी (ता. १२) दुपारी घेऊन गेला होता, अशी तक्रार पीडित मुलीच्या आईवडिलांनी सोमवारी (ता. १३) सकाळी म्हसरूळ पोलिसांकडे दिली. त्यावरून वरिष्ठ पोलिस निरीक्षक भारतकुमार सूर्यवंशी यांच्या आदेशान्वये गुन्हे शोध पथकाचे सहाय्यक पोलिस निरीक्षक सुधीर पाटील यांच्या मार्गदर्शनाखाली गुन्हे शोध पथकाने शोध मोहीम राबविली. दोघांचेही मोबाईल बंद असल्याने तपासात अडचण निर्माण झाली. मात्र, पोलिसांनी मोठ्या कौशल्याने तांत्रिक विश्लेषणाच्या आधारे मोबाइल टॉवर लोकेशन घेऊन दुपारी नांदूर नाका परिसरातून संशयित दीपक व पीडित मुलीस ताब्यात घेतले. संशयिताची कारही पोलिसांनी जप्त केली. दरम्यान, म्हसरूळ पोलिस ठाण्याच्या हद्दीत राहणाऱ्या पीडित मुलीशी संशयित दीपक याची जवळपास दीड वर्षापासून ओळख असल्याचे बोलले जात आहे. याच ओळखीचे रूपांतर पुढे प्रेमात झाले, अशीही चर्चा पोलिस वर्तुळात रंगली आहे. विशेष म्हणजे संशयित दीपक विवाहित आहे. येथील एका पोलिस शिपायाने अल्पवयीन मुलीचे अपहरण केल्याचे उघडकीस आले असून, याप्रकरणी पीडितेच्या आईवडिलांनी दिलेल्या तक्रारीवरून म्हसरूळ पोलिसांनी संशयितासह पीडित मुलीला अवघ्या दोन तासांत ताब्यात घेतले.

पीडितेच्या आई-वडिलांनी तक्रार दिल्यानंतर गुन्हे शोध पथकाने तपासाची सूत्रे वेगाने फिरवून संशयितासह पीडितेला ताब्यात घेतले. याप्रकरणी अपहरणाचा गुन्हा दाखल करून संशयितास अटक केली आहे. पीडितेची वैद्यकीय तपासणी करून तिला आईवडिलांच्या ताब्यात दिले आहे. वैद्यकीय अहवाल आल्यानंतर वरिष्ठांच्या मार्गदर्शनानुसार संशयितावर पुढील कारवाई केली जाणार आहे. महिला अधिकारी धनश्री पाटील यांनी मुलीचे जबाब घेतले असून, त्या पुढील तपास करीत आहेत. -भारतकुमार सूर्यवंशी, वरिष्ठ पोलीस निरीक्षक, म्हसरूळ