MPSC Success Story : मनात जिद्द व चिकाटी असली तर माणसाला कुठलीही गोष्ट अशक्य नसल्याचे कळमदरी (ता. नांदगाव)येथील अक्षय पगार सिद्ध करून दाखविले आहे.

महाराष्ट्र राज्य लोकसेवा आयोगांतर्गत २०२१ मध्ये घेण्यात आलेल्या परीक्षेत अक्षयने उपमुख्य कार्यकारी अधिकारी (वर्ग एक) पदाला गवसणी घालत ग्रामीण भागातील मुले देखील उंच भरारी घेऊ शकतात हे दाखवून दिले.

मागील वर्षी पहिल्याच प्रयत्नात अक्षयने पोलिस उपनिरीक्षक पदाला गवसणी घातली होती. (MPSC Success Story Kalamdari Akshay gets post of Deputy Chief Executive Officer nashik news)

हेही वाचा : Credit Card फसवणूक....काय घ्याल काळजी?

अक्षयचे प्राथमिक शिक्षण कळमदरी येथील जिल्हा परिषद शाळेत तर माध्यमिक शिक्षण साकोरा येथे रयत शिक्षण संस्थेच्या माध्यमिक विद्यालयात झाले. लहानपणापासून शेतकरी जीवन अनुभवलेल्या पगार कुटुंबीयांनी अक्षयला शिक्षणासाठी प्रेरणा दिली.

केटीएचएम महाविद्यालयात बारावीपर्यंत शिक्षण घेतल्यानंतर सिंहगड कॉलेज येथे अभियांत्रिकी शिक्षण घेत असतानाच अक्षय स्पर्धा परीक्षेकडे वळला. २०२१ मध्ये एमपीएससीमार्फत घेण्यात आलेल्या परीक्षेतून त्याची निवड उप मुख्य कार्यकारी अधिकारी (वर्ग १) म्हणून झाली. येथील शेतकरी व विविध कार्यकारी सोसायटी अध्यक्ष संजय पगार यांचा तो मुलगा आहे.

"लहानपणापासून सैन्यदलात किंवा प्रशासनात येऊन देशसेवेचे स्वप्न होते. या यशामुळे मनोबल वाढले असून या पुढेही अभ्यास करण्याचा मानस आहे . आजच्या यशाने वडिलांचे स्वप्न पूर्ण केल्याचे समाधान वाटत आहे." - अक्षय पगार