नाशिक : नाशिक रोडपासून जवळच असलेल्या चांदगिरी शिवारातील कडवा कालव्यात गुरुवारी (ता. ३) महिलेसह दोन मुलांच्या मृतदेहाचे गूढ उकलले आहे. शिंदे (ता. नाशिक) येथील कुटुंबाचे असून, पतीच्या जाचाला कंटाळून महिलेसह दोन चिमुकल्यांसह पाटात उडी मारून आत्महत्या केल्याचे उघडकीस आले आहे. वाचा सविस्तर प्रकार
असा आहे प्रकार
बुधवारी (ता. २) सकाळी सहाच्या सुमारास चांदगिरी शिवारात कडवा कालवा येथे पाण्यात एक वर्षाच्या मुलाचा मृतदेह पाण्यावर तरंगून आला होता. त्यानंतर या घटनेला २४ तास उलटत नाही तोच शुक्रवारी (ता. ४) दुपारी एकच्या सुमारास महिला व आणखी एक सहा वर्षांच्या चिमुकलीचा याच कालव्यात मृतदेह वाहून आला. महिलेच्या मृतदेहाची ओळख पटली असून, संबंधित मृतदेह दीपाली कमलेश पाडवी (वय २८, रा. शिंदे) या महिलेचा असून, दोन्ही मृतदेह तिची मुलगी राजश्री (वय ६) आणि कृष्णा (वय एक) यांचे आहेत. महिलेने दोन्ही लेकरांसह आत्महत्या केल्याचे उघडकीस आले.
असे उकलले गूढ
पोलिसांनी सांगितले, की कृष्णा पडवी या चिमुकल्याची ओळख याचे वडील कमलेश पडवी यांच्यामुळे पटली. दरम्यान त्याचा मेहुणा महिंद्र गवळी याने आपली बहीण दीपाली कमलेश पडवी (वय २८) व पाच वर्षांची मुलगी राजश्री या घरातून बेपत्ता झाल्याची तक्रार नाशिक रोड पोलिस ठाण्यात दिली. या घटनेचा तपास सुरू असताना शनिवारी (ता. ५) दुपारी एकच्या सुमारास बेपत्ता असलेल्या दीपाली पडवी व चिमुकली राजश्री यांचे मृतदेह त्याच ठिकाणी सापडले. तिन्ही मृतदेहांची ओळख पटल्यानंतर पोलिस निरीक्षक सूरज बिजली, पोलिस उपनिरीक्षक भालेराव व सहकारी घटनास्थळी पोचले. मृतदेहांचे सोपस्कार पार पाडून मृतदेह उत्तरीय तपासणीसाठी पाठविण्यात आले.
छळामुळेच आत्महत्या
मृत महिलेचा भाऊ महेंद्र गणपत गवळी (वय २७, कोटंबी, बोरवठ, ता पेठ) यांनी नाशिक रोड पोलिस ठाण्यात तक्रार दिली आहे. त्यांच्या तक्रारीनुसार, कमलेश चंदर पाडवी (वय ३०) यांच्या शारीरिक व मानसिक छळामुळेच बहीण दीपाली हीने राजश्री आणि कृष्णा यांच्यासह आत्महत्या केली. २००५ ला दीपालीला मुलगी झाल्यापासून पती कमलेश तिचा छळ करत होता. माहेरून दुचाकी घ्यायला १५ हजार रुपये आणावेत, यासाठी कमलेश दारू पिऊन तिच्यावर संशय घ्यायचा. माहेरी जाऊ देत नसे. पतीच्या सततच्या
छळाला कंटाळून दीपालीने दोन लेकरांसह आत्महत्या केली.
संपादन - किशोरी वाघ
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.