नाशिक : (नांदगाव) येथील रेल्वेच्या फाटकाला पर्याय म्हणून भुयारी मार्गाच्या कामाला वेग आला आहे. रेल्वे फाटकावर चिकटवलेली नोटीसमध्ये देखील नोंद असून रेल्वे फाटक गुरुवारपासून बंद असणार आहे. बोगद्याचे काम अपूर्ण असतानाच रेल्वे फाटक गुरुवार (ता. 18) पासून कायमस्वरूपी बंद होणार हे कळताच नांदगावकरांकडून विरोध केला जात आहे.

नांदगावकरांकडून होतोय विरोध

रेल्वे फाटक गुरुवार (ता. 18) पासून कायमस्वरूपी बंद होणार आहे. रेल्वेच्या अधिकाऱ्यांनी तशी सूचना काढली आहे. ही सूचना फाटकावर लावली आहे. या फाटकाला पर्याय म्हणून सुरू असलेल्या "सब-वे'च्या कामाअगोदर कायमस्वरूपी फाटक बंद करण्याच्या रेल्वे अधिकाऱ्यांच्या भूमिकेला नागरिकांनी आता विरोध केला आहे. दरम्यान, पालिकने लाखो रुपये खर्च करून उभारलेल्या मटण मार्केटला खेटून भुयारी मार्गावर डाउन साइडचे प्रवेशद्वार होणार, की रेल्वे भुयारी मार्ग पूर्ण करून तसाच टाकून देणार याबाबत संभ्रम कायम आहे. 

तीन मीटर उंचीचा "सब वे' असणार

भुयारी मार्गाचा रस्ता कुठून कसा काढायचा, यावर अजूनही स्पष्टता नसताना रेल्वे अधिकाऱ्यांनी पर्याय देण्यापूर्वीच फाटक बंद करण्याचा निर्णय घोषित केला आहे. भुसावळ विभागातील फाटक बंद करण्याच्या दृष्टीने रेल्वेतर्फे सध्याच्या फटकाजवळील खांब क्रमांक 184/85 मधील जागेवर सध्या भुयारी मार्गाचे काम सुरू आहे. लोहमार्गाखालून सहा मीटर खोल व तीन मीटर उंचीचा "सब वे' असणार आहे. यापूर्वी या कामासाठी मुंबई येथील जय इन्फ्रा प्रा. कंपनीला दोन महिन्यांची मुदत दिली होती. त्यांनी कामालाही सुरवात केली होती. मात्र, कोरोनामुळे हे काम रेंगाळले होते. लेंडी नदीपात्राशेजारी जुन्या फाटकाजवळ दोन महिन्यांत काम पूर्ण होऊन त्याखालील वाहतूक येवला रस्त्याला संलग्न करण्याचे नियोजनही ठरले होते. तरीही काम रेंगाळले होते. अप साइडने बोगद्याचे काम जवळपास पूर्णत्वाकडे आले आहे. 

वाहनांची कोंडी होणार

भुसावळकडील डाउन बाजूच्या लोहमार्गाखालील बोगद्याच्या कटिंग कामाला सुरवात झाली. हे काम प्रगतिपथावर असताना, गुरुवारपासून फाटक कायमस्वरूपी बंद करण्याचे आदेश रेल्वे अधिकाऱ्यांनी काढले आहेत. सध्या या फाटकातून औरंगाबाद व येवल्याकडे राज्य महामार्ग जात असल्याने वाहतूक होते. फाटक बंद केल्याने तीन किलोमीटर अंतरावरील उड्डाण पुलाकडून वाहतूक वळवून शहरात प्रवेश घ्यावा लागणार आहे. विशेषतः बाजारहाटाला येणाऱ्या व नव्या प्रशासकीय इमारतीकडे जाणाऱ्या वाहनांची कोंडी होणार आहे. 

हेही वाचा > लुटालुट थांबणार तरी कधी?...बियाण्यांचा दर तिप्पट...शेतकरी हतबल!

अजूनही काम अपूर्ण असून, फाटक कायमस्वरूपी बंद करण्याला विरोध करू. यामुळे शहराचे अगोदरच विभाजन झाले. आता ये-जा करण्याचा प्रश्‍न गंभीर बनला आहे. - संतोष गुप्ता, नांदगाव  

हेही वाचा > महत्वाची बातमी : दहावी, बारावी निकालाबाबत अनिश्‍चितता कायम!