Nashik News : शासनाच्या शालेय शिक्षण विभागाकडून जिल्हास्तर निपुण महोत्सवांतर्गत गुरुवारी (ता. २८) शासकीय कन्या शाळा, नाशिक येथे जिल्हास्तरीय निपुणोत्सव कार्यक्रम घेण्यात आला. जिल्हास्तरीय निपुणोत्सवात जिल्ह्यातील १५ तालुक्यांमध्ये प्रथम क्रमांक विजेत्या शैक्षणिक साहित्यधारक १५ शाळा व शिक्षकांनी सहभाग घेतला. शासकीय कन्या शाळेत गुरुवारी (ता. २८) जिल्हास्तरीय निपुणोत्सव कार्यक्रम झाला. (Nashik 15 schools and teachers participated in district level Nipunotsav program)

जिल्हास्तरीय निपुणोत्सवात १५ तालुक्यांच्या शैक्षणिक साहित्य व नावीन्यपूर्ण उपक्रमांचे सादरीकरणाचे अवलोकन करण्यासाठी जिल्ह्यातील आदर्श शाळांचे मुख्याध्यापक, निवडक विषय साधन व्यक्ती, केंद्रप्रमुख, विस्तार अधिकारी व सर्व गटशिक्षणाधिकारी उपस्थित होते.

या वेळी विद्या समीक्षा केंद्र (पुणे) येथील राजेश कोरडे यांनी निपुण भारत अभियानात विद्या समीक्षा केंद्रांची भूमिका यावर ऑनलाइन मार्गदर्शन केले. डाएट अधिव्याख्याता रंजना लोहकरे यांनी निपुण भारत अभियान अंमलबजावणीत शिक्षक व अधिकारी यांच्या भूमिकेबाबत मार्गदर्शन केले.

या वेळी उपस्थित शिक्षक व क्षेत्रीय अधिकाऱ्यांना शिक्षणाधिकारी डॉ. नितीन बच्छाव यांनी मार्गदर्शन केले. जिल्हा शिक्षण प्रशिक्षण संस्थेचे प्राचार्य अनिल गौतम, उपशिक्षणाधिकारी भास्कर कनोज, धनंजय कोळी उपस्थित होते.

या वेळी निपुण भारत रांगोळी व निपुण भारत सेल्फी पॉइंट आणि मतदान जागृती सेल्फी पॉइंट यांनी सर्वांचे लक्ष वेधून घेतले. सहाय्यक कार्यक्रम अधिकारी सुनील दराडे यांनी सूत्रसंचालन केले. यशस्वीतेसाठी अनिता देशमुख, शैलेश तवर, सोमनाथ भाबड, यशवंत रायसिंग आदींनी परिश्रम घेतले.

निफाड प्रथम

निपुण भारत शैक्षणिक साहित्य स्टॉल स्पर्धेचा निकाल या वेळी घोषित करण्यात आला. निफाडने प्रथम क्रमांक पटकावला. सुरगाणा द्वितीय, तर सिन्नरने तृतीय क्रमांक मिळविला.