Nashik Agriculture News : मिरचीच्या पिकात टरबुजाचे आंतरपीक घेऊन अवघ्या तीन महिन्यांत दोन लाखांचे उत्पन्न घेतले. आणखी दोन महिन्यांपर्यंत तीन ते चार लाखांचे उत्पन्न होणार असल्याने तब्बल पाच लाख रुपयांचे उत्पादन घेण्याची किमया खामखेडा येथील शेतकरी दत्तू बोरसे यांनी साधली आहे. शेतकरी दत्तू देवमण बोरसे यांनी उन्हाळ कांद्यासोबतच पाणी कमी असल्याने दीड एकर क्षेत्रावर ज्वेलरी जातीच्या मिरचीची १ जानेवारीला लागवड केली होती. (Nashik Agriculture Chilli farming flourished through water planning in khamkheda marathi News)

मिरची लागवडसाठी मल्चिंग व ठिबक केल्याने त्यांनी यात आंतरपीक म्हणून टरबुजाची लागवड करण्याचा निर्णय घेतला. त्यात त्यांनी रसिका जातीच्या टरबुजाची लागवड केली. एक एकर क्षेत्रासाठी मिरचीची ६ हजार व टरबूजाची साढे सहा हजार रोपे लागवड केली. दोन्ही पिकांची योग्य मशागत व निगा राखल्याने दोन महिन्यांतच टरबूजाचे पिक काढणीला आले.

एक एकर क्षेत्रात २० टन टरबुजाचे उत्पन्न मिळाले. अकरा रुपये दराने टरबूज दिल्याने यातून त्यांना दोन लाख वीस हजार रुपयांचे उत्पादन मिळाले. तीन महिन्यांनंतर मिरचीचा पहिला तोडा करून दीड टन निघाला. ही मिरची खामखेडा व मालेगाव येथील बाजारपेठेत विक्री केली.

यातून त्यांना पहिल्या तोड्याला साधारणता ५३ रूपये सरासरी दर मिळाला. पहिल्याच तोड्यात त्यांना ऐंशी हजार रुपये मिळाले. आणखी दीड ते दोन महिन्यांपर्यंत मिरचीचे तीन ते चार तोडे होतील. यात त्यांना अजून दहा टन मिरचीचे उत्पादन होईल अशी आशा आहे. यातून त्यांना सरासरी ४० रूपये बाजारभाव मिळाला तरी साडे तीन ते चार लाखांचे उत्पादन मिळणार आहे.(latest marathi news)

पाण्याचा सुयोग्य वापर

विहिरीने तळ गाठल्याने पाण्याचे योग्य नियोजन करत काटकसरीने वापर करून आंतरपिकाचा प्रयोग केला. दोन्ही पिकातून लागवडीचा खर्च व मजूर खर्च वजा जाता त्यांना एक एकर क्षेत्रातून पाच ते सहा लाखांचे उत्पादन मिळणार आहे.

''मी कृषी पदवीधारक असून शेतीत प्रयोग केले तरच उत्पन्न मिळू शकते. कुटुंबीयांनी सुयोग्य नियोजन केल्याने आंतर पिकातून कमी खर्चात चांगले उत्पादन मिळवू शकलो.''- तुषार दत्तू बोरसे, शेतकरी, खामखेडा.

दोन्ही पिकांचा खर्च

एक एकर क्षेत्रासाठी ६ हजार रोपे १ रूपये २० पैसे दराने व टरबूजाची साडेसहा हजार रोपे दीड रुपये दराने खरेदी केली. रोपांसाठी अठरा हजार खर्च, मल्चिंग व ठिबकसाठी बारा हजार रुपये खर्च आला. शेणखत व रासायनिक खते व फवारणी असा ३० हजार रूपयांचा खर्च झाला.