Nashik News : शाहीर अण्णा भाऊ साठे यांची उद्या (ता.1) जयंती असून यानिमित्ताने शहरातील मुख्य रस्त्यावरून मिरवणूक काढण्यात येते. जयंती मिरवणुकीमुळे वाहतूकीला अडथळा निर्माण होऊन समस्या निर्माण होण्याची शक्‍यता आहे. त्यामुळे वाहतूक शाखेतर्फे मिरवणूक मार्गावरील वाहतूक मार्गात बदल करण्यात आला असून तसे आदेश वाहतूक शाखेचे उपायुक्त चंद्रकांत खांडवी यांनी जारी केले आहेत. (Anna Bhau Sathe Jayanti procession tomorrow)

लोकशाहीर अण्णा भाऊ साठे यांची जयंती उद्या (ता.1) शहरभर उत्साहात साजरी केली जाणार आहे. त्यासाठी शहरातील मुख्य रस्त्यावरून मिरवणूकही निघणार आहे. मिरवणुकीला महात्मा फुले मार्केट येथून प्रारंभ होईल. चौक मंडई, फाळके रोड, अब्दुल हमीद चौक, भद्रकाली मार्केट, बादशाही कॉर्नर, गाडगे महाराज पुतळा, मेनरोड, धुमाळ पॉईंट, रविवार कारंजा, टिळकरोड, सांगली बॅंक कॉर्नर, परशुराम सायखेडकर नाट्यगृह, शालिमार, खडकाळी सिग्नल मार्गे किटकॉट कॉर्नर आणि अण्णा भाऊ साठे पुतळा येथे मिरवणुकीचा समारोप होणार आहे.

या मार्गावरून मिरवणूक निघणार असल्याने वाहतुकीचा खोळंबा होण्याची शक्‍यता आहे. त्यामुळे गुरुवारी (ता.1) सकाळी १० वाजेपासून मिरवणूक संपेपर्यत या मार्गावरील वाहतूक बंद करण्यात आली आहे. या मार्गाने येणाऱ्या वाहनांनी पर्यायी मार्गांचा अवलंब करावा. (latest marathi news)

वाहतूक मार्गात बदल

निमाणी व पंचवटी कारंजा येथून सुटणाऱ्या शहर बसेस या पंचवटी डेपोतून सुटतील तर, दिंडोरी, पेठ, ओझरकडून नाशिककडे येणाऱ्या बसेस आडगावा नाका, कन्नमवार पुलावरून द्वारका सर्कलकडून सारडा सर्कल, गडकरी सिग्नल, सिबिएसमार्गे मार्गस्थ होतील.

तसेच, अण्णा भाऊ साठे पुतळा ते कालिदास कलामंदिर ते शिवसेना भवन हा रस्ता वाहतुकीसाठी बंद राहिल. तरी वाहतूक मार्गाचा अवलंब वाहनाचालकांनी करावा असे आवाहन वाहतूक शाखेचे उपायुक्त चंद्रकांत खांडवी यांनी केले आहे.