नाशिक : औरंगाबाद महामार्गावरील हॉटेल मिरची चौकात झालेल्या अपघातानंतर महापालिका प्रशासनाने तातडीने येथे सुधारणा करण्याचे काम हाती घेतले आहे. या भागातील अतिक्रमण हटविल्यानंतर आता रस्ता रुंदीकरण, रस्ता दुरुस्तीसह गतिरोधक टाकण्याचे काम हाती घेण्यात आले आहे. (Nashik Bus Fire Accident Road widening speed breaker work at Hotel mirchi Chowk Nashik Latest Marathi News)

बस दुर्घटनेच्या पार्श्वभूमिवर चौकात आणि मार्गावरील खड्डे बुजविण्याचे काम सुरू करण्यात आले आहे. झाडाच्या फांद्या छाटण्यात येऊन दृश्यमानता वाढवण्यात आली आहे. रस्त्याच्या दोन्ही बाजूला स्वच्छता करण्यात आली आहे. तपोवनकडून येणारे डावे वळण त्यामुळे मोठे करण्यात येत आहे.

तसेच, बांधकाम विभागाच्या अभियंत्यांनी मंगळवारी (ता. ११) महावितरण विभागाच्या अधिकाऱ्यांशीही चर्चा केली. मार्गातील ट्रान्सफॉर्मर हटविण्याबाबत अधिकाऱ्यांनी अनुकूलता दर्शविली आहे. तसेच, ओव्हरहेड वायर अंडर ग्राउंड करण्याबाबतही निर्णय घेतला जाणार आहे. नगरनियोजन विभागाने अनधिकृत व अतिक्रमित बांधकामांचे डिमार्केशन करून दिल्यानंतर संबंधितांना नोटीस देण्यात आल्या आहेत.

त्यानंतर रस्त्याचे रुंदीकरणदेखील करण्यात येणार आहे. महत्त्वाचे म्हणजे या चौकात स्पीडब्रेकर व डिव्हायडर बसवण्यात येणार आहे. त्याचे काम त्वरित सुरू होणार असल्याची माहिती बांधकाम विभागाने दिली आहे. शहरात इतरही ठिकाणी रस्त्या दुरुस्तीची कामे सुरू आहेत. पश्चिम विभागातील खडकाळी सिग्नल ते दूध बाजार रस्ता कामाची पाहणी पाहणी केली.