Nashik Accident News : येथील संवदगाव फाट्यावर पहाटे पायी फिरायला जाणाऱ्या पिता-पुत्राला पिक-अपने जबर धडक दिल्याने अपघातात दोघांचाही मृत्यू झाला. बुधवारी (ता. १७) सकाळी पावणेसातच्या सुमारास ऐन मोहरमच्या दिवशी हा अपघात घडल्याने बजरंगवाडी भागात शोककळा पसरली आहे. या प्रकरणी रात्री उशिरापर्यंत पिक-अप चालकाविरुद्ध पवारवाडी पोलिस ठाण्यात गुन्हा दाखल करण्याचे काम सुरू होते. (Father and son died in an accident in malegaon )

येथील बजरंगवाडी भागातील माजी नगरसेवक व महापालिकेतील शिक्षण मंडळाचे माजी सभापती शेख निसार शेख अकबर ऊर्फ राशनवाले (वय ५५) व त्यांचा मुलगा शेख अबरार शेख निसार (२०) युनिकॉर्न दुचाकीने संवदगाव फाट्याकडे फिरायला गेले होते. त्या वेळी भरधाव येणाऱ्या पिक-अपने (एमएच ४८ सीबी ८६६३) त्यांच्या दुचाकीला जबर धडक दिली. अपघातात निसार यांच्या डोक्याला मार लागून त्यांचा जागीच मृत्यू झाला.

मुलगा अबरारने जखमी अवस्थेतच वडिलांचा मोबाईल काढून कुटुंबीयांना अपघाताची माहिती दिली. त्यानंतर काही वेळातच अबरारचाही वडिलांचा मृत्यू बघून धास्तीने मृत्यृ झाला. अबरार अनेक दिवसांपासून किडनीच्या आजाराने त्रस्त होता. डायलिसिससाठी मुंबई, पुणे व मालेगाव येथील रुग्णालयांत त्याच्यावर उपचार सुरू होते. डॉक्टरांनी सांगितल्यानुसार रोज पहाटे नमाजनंतर दोघे पिता-पुत्र फिरण्यासाठी वेगवेगळ्या ठिकाणी जात असत.

मात्र बुधवारी काळाने त्यांच्यावर झडप घातली. अपघातात दोघांचाही मृत्यृ झाला. घटनास्थळी माजी नगरसेवक खालीद हाजी, शेख मुश्‍ताक शेख शरीफ, समशेर खान, सिकंदर शेख यांच्यासह नातेवाईक पोचून त्यांना सामान्य रुग्णालयात दाखल केले. दोघांवर येथील बडा कब्रस्तानात दफनविधी पार पडला. या वेळी शहरातील सामाजिक, शैक्षणिक व राजकीय क्षेत्रातील नागरिक उपस्थित होते.