Nashik News : यावर्षी पाऊस न झाल्याने दुष्काळग्रस्त परिस्थिती निर्माण झाली आहे. शेतकऱ्यांना पावसाअभावी शेतीवर अवलंबून न राहता संसाराचा गाडा ओढण्यासाठी इतर जोडधंद्यांचा मार्ग निवडावा लागत आहे. मनमाड-नांदगाव रोडलगतच्या लोहकरे कुटुंबियांनी पारंपारिक पद्धतीचे रसवंतीगृह सुरू करून रोजगाराचा नवा पर्याय शोधला आहे. उसाचा थंड रस नागरिकांना उन्हापासून थंडावा देत आहे. (nashik Lohakare family found employment option through Raswanti business marathi news)

गुऱ्हाळघराचे वैशिष्ट्ये म्हणजे घुंगराचा मधूर आवाज. घुंगराच्या मधूर आवाजाने जाणाऱ्या-येणाऱ्यांचे लक्ष वेधूले जाते. दूरवरून येणारा आवाज ऐकूनच प्रत्येकजण ‘आता रस घेवूया’ असे म्हणत रसवंतीगृहाकडे वळत आहे. मार्च महिन्याच्या सुरुवातीपासूनच वातावरणात उष्णतेने उच्चांक गाठल्याने नागरीक हैराण झाले आहेत. सध्या उष्णतेचा पारा ३८ अंशावर आल्यामुळे दुपारच्या वेळी घराबाहेर पडणे म्हणजे आजारांना निमंत्रण दिल्यासारखे आहे. (Latest Marathi News)

उन्हाळ्यात शरीराचे तापमान योग्य राखण्यासाठी थंडगार शितपेयांना मोठी मागणी असते. ऊसाचा रस व नारळपाण्याला सर्वाधिक प्राधान्य दिले जाते. लिंबू, आलेयुक्त ऊसाचा आयुर्वेदिक रस पिल्याने शरीराचे तापमान राखले जाते. त्याचबरोबर रक्तातील साखरेचे प्रमाणही वाढवून प्रफुल्लीत बनवते. त्यामुळे उसाच्या ताज्या रसाला ग्राहक अधिक पसंती देतात.

''शेतीला जोडधंदा तसेच उन्हाळामध्ये शेतीकामे नसल्याने अनेक वर्षापासून रसवंतीचा व्यवसाय करत आहे. या व्यवसायमुळे संसाराचा हातभार लागतो.''- कल्पना लोहकरे, रसवंतीगृह व्यावसायिक