Nashik News : शहर वाढतं असताना सार्वजनिक वाहतूक व्यवस्था सक्षम नसल्याने शहरात खासगी वाहनांची संख्या वाढतं आहे. त्यामुळे अपघातांची संख्यादेखील झपाट्याने वाढतं आहे. अपघातमुक्त शहर करण्यासाठी महापालिकेच्या ट्रॅफिक सेलमार्फत स्वतंत्र वाहतूक आराखडा तयार केला जात आहे. (nmc Independent Transport Plan for Accident Free City)

यात अपघातप्रवण क्षेत्रात अपघाताची कारणे शोधून त्यावर उपाययोजना करणे, पादचाऱ्यांना भयमुक्त वातावरणात रस्ता ओलांडण्यासाठी उपाययोजना सुचवून नियमावलीदेखील केली जाणार असल्याची माहिती ट्रॅफिक सेलचे उपअभियंता रवींद्र बागूल यांनी दिली. शहराचा विस्तार झपाट्याने वाढत असताना इमारतींची संख्या वाढत आहे.

प्रत्येक घरात किमान एक दुचाकी व एक चारचाकी आहे. काही घरांमध्ये हे प्रमाण अधिक आहे. मात्र वाहनांची संख्या वाढत असताना पार्किंगच्या समस्यादेखील वाढल्या आहेत. पार्किंगसाठी जागा नसल्याने रस्त्यांवर वाहने उभी केली जातात. जुने नाशिक व शहरातील इतर गावठाणामध्ये ही समस्या अधिकच गंभीर आहे.

गावठाणातील वाहने शालिमार, द्वारका या भागात पार्क केली जातात. यावरून शहरात वाहनांची संख्या झपाट्याने वाढत असल्याचे दिसून येते. वाहनांची संख्या वाढत असली तरी रस्त्यांची संख्या व आकारमान मात्र वाढत नाही. शहरात भुयारी मार्ग व उड्डाणपुलांची संख्यादेखील समाधानकारक नाही. अशा परिस्थितीमध्ये अपघातांची संख्या झपाट्याने वाढत आहे. त्यामुळे महापालिकेच्या ट्रॅफिक सेलने वाहतूक आराखडा तयार करण्याचे काम सुरू केले आहे. (latest marathi news)

यातून वाहतूक कोंडी कमी करण्याबरोबरच अपघातमुक्त शहर करण्याचे उद्दिष्ट असल्याची माहिती ट्रॅफिक सेलचे उपअभियंता रवींद्र बागूल यांनी दिली. पाचशे मीटर अंतरामध्ये तीन वर्षात सलग पाच अपघात झाले किंवा अपघातात दहा व्यक्तींचा मृत्यू झाला तर अशा ठिकाणी ब्लॅक स्पॉट घोषित केले जातात. शहरात असे २६ अपघातप्रवण क्षेत्र अर्थात ब्लॅक स्पॉट आहेत.

ब्लॅक स्पॉट निर्मूलनासाठी गतिरोधक बसविण्याबरोबरच पादचाऱ्यांना रस्ता ओलांडण्यासाठी पांढरे पट्टे मारणे, कॅट आय बसविणे, सूचना फलक लावणे या उपाययोजना करण्यात आल्या आहेत. मात्र आता अपघातमुक्त ब्लॅक स्पॉट करण्यासाठी त्या ठिकाणांचा अभ्यास केला जाणार आहे. किती अपघात झाले, अपघाताचा प्रकार कसा होता, पादचाऱ्याचे अपघात किती झाले, दुचाकी व चारचाकी वाहनांच्या अपघातांची संख्या यांचे सर्वेक्षण केले जाणार आहे.

ट्रॅफिक सेलचे नियोजन

- सार्वजनिक वाहतुकीचा वापर

- वाहनतळांची निमिर्ती

- वाहतूक बेटांचे सुशोभीकरण

- सर्वंकष वाहतूक आराखड्याची अंमलबजावणी

- रस्तावर सायकल ट्रॅक, फुटपाथ, झेब्रा क्रॉसिंग टाकणे.

- सार्वजनिक वाहतुकीसाठी डेपो, टर्मिनल, शेल्टरची उभारणी

- उड्डाणपूल, पूल उभारणे.

- गर्दीच्या वेळी मार्गामध्ये बदल