नाशिक : महापालिकेकडून दरवर्षी दिली जाणारी कर सवलत योजना कायम ठेवण्याचा निर्णय घेण्यात आला आहे. गाळेधारकांवरील थकबाकी वसुल करण्यासाठी गाळे जप्तीची कारवाईही केली जाणार असल्याची माहिती कर विभागाचे प्रभारी उपायुक्त विवेक भदाणे यांनी दिली. (Nashik NMC Tax discount Scheme Continued marathi news)

महापालिकेला यंदा मालमत्ता कराच्या माध्यमातून चांगले उत्पन्न प्राप्त झाले. मार्चअखेर २०६ कोटी रुपयांचे उत्पन्न तिजोरीत जमा झाले. त्यात कर सवलत योजनेतून उत्पन्नाचा वाटा अधिक असल्याने या वर्षीदेखील कर सवलत योजना सुरू ठेवण्याचा निर्णय घेण्यात आला आहे.

नियमित करदात्यांना प्रोत्साहन देण्यासाठी एप्रिल महिन्यात घरपट्टीच्या रकमेत ८ टक्के, मेमध्ये ६ टक्के, तर जून महिन्यात ३ टक्के अशी सवलत योजना आहे. ३० जूनपर्यंत सवलत योजना सुरू राहील. सवलतीच्या महिन्यात महापालिकेच्या कर विभागाकडे मालमत्ता करातून जवळपास २५ टक्के रक्कम जमा होते. (latest marathi news)

त्यामुळे महसुलाच्या बाबतीत दिलासा मिळतो. मागील वर्षात २ लाख १६ हजार २४० मिळकतधारकांना योजनेचा लाभ मिळाला होता. सवलत योजनेतून ९०. ७७ कोटी रुपयांचा महसुल मिळाला होता. त्यामुळे यंदादेखील सवलत योजना लागू करण्याचा निर्णय घेण्यात आला आहे. ऑनलाइन कर भरणा केल्यास अतिरिक्त दोन टक्के सवलतीचा लाभ मिळणार आहे. सौरऊर्जा, सोलर प्रकल्प, पाण्याचा पुनर्वापर संदर्भातील सवलतीत कोणत्या तरी एकाच सवलतीचा लाभ करदात्यांना दिला जाणार आहे.

गाळे जप्ती मोहीम

महापालिका हद्दीमध्ये जवळपास २९०० ओटे, गाळेधारक आहे. त्यांच्याकडे जवळपास ५१ कोटी रुपयांची थकबाकी आहे. १ एप्रिल २०२३ ते ३१ मार्च कालावधीत १०.३० कोटी रुपये वसुल झाले. ४१.३० कोटी रुपये वसुल करण्यासाठी मार्चअखेरही गाळे जप्तीची मोहीम सुरू ठेवली जाणार आहे. अशी माहिती प्रभारी उपायुक्त विवेक भदाणे यांनी दिली.