Nashik News : शहर पोलिस आयुक्तालयातर्फे रविवारी (ता. ७) पोलिस भरतीसाठीची लेखी परीक्षा घेण्यात आली. या परीक्षेचा निकाल जाहीर करण्यात आला आहे. या परीक्षेसंदर्भातील हरकतींसाठी उमेदवारांना मंगळवारी (ता. ९) दुपारी बारापर्यंत पोलिस मुख्यालयाचे उपायुक्तांकडे अर्जासह उपस्थित राहण्यासाठी वेळ देण्यात आलेली आहे. (Police Recruitment 2024 Result of written exam declared)

शहर पोलिस आयुक्तालयातील रिक्त ११८ शिपाई पदांसाठी रविवारी (ता.७) लेखी परीक्षा घेण्यात आली. या लेखी परीक्षेसाठी १ हजार १९७ उमेदवारांपैकी १ हजार १८५ जणांनी परीक्षा दिली होती. त्यानंतर परीक्षेची उत्तर पत्रिका (अन्सर की) आयुक्तालयाने संकेतस्थळ व आयुक्तालयाच्या फलकावर जारी केली होती.

या लेखी परीक्षेचा निकाल सोमवारी (ता. ८) आयुक्तालयाच्या nashikcitypolice.gov.in या संकेतस्थळावर आणि आयुक्तालयाच्या सूचना फलकावर जाहीर केला आहे. (latest marathi news)

या लेखी परीक्षेसंदर्भात मिळालेले गुणांबाबत काही हरकती असतील तर अशा उमेदवारांनी त्यांच्याकडील ओएमआर दुय्यम प्रतींसह मंगळवारी (ता.९) दुपारी बारापर्यंत मुख्यालयाचे पोलिस उपायुक्त चंद्रकांत खांडवी यांच्या दालनात लेखी अर्जासह उपस्थित राहण्याचे आवाहन पोलिस आयुक्तालयातर्फे करण्यात आलेले आहे.