Nashik Pune Railway : नाशिक-पुणे जलद रेल्‍वेमार्गाबाबत रेल्‍वमंत्र्यांशी चर्चा झाली आहे. या मार्गावरील बोगद्यामुळे प्रकल्‍पाच्‍या खर्चात वाढ होत आहे.

त्‍यामुळे नाशिक-शिर्डी-पुणे अशा पर्यायी रेल्‍वेमार्गाबाबत रेल्‍वे मंत्रालयाकडून विचार सुरू असल्‍याची माहिती उपमुख्यमंत्री देवेंद्र फडणवीस यांनी दिली. (Nashik Pune railway service via Shirdi information was given by Deputy Chief Minister Devendra Fadnavis nashik news)

श्री. फडणवीस म्‍हणाले, की मार्गातील बदलामुळे अंतरात ३३ किलोमीटरची वाढ होणार असली तरी या मार्गाचा फायदा नाशिक, पुण्यासोबत शिर्डीदेखील होणार आहे. जास्‍तीत जास्‍त प्रवासी उपलब्‍ध होऊ शकतील.

याबाबत लवकरच प्रस्ताव केंद्रीय मंत्रिमंडळासमोर मंजुरीसाठी सादर केला जाणार असल्‍याचे त्यांनी नमूद केले. यामुळे नाशिक-पुणे अंतर दोन तासांत गाठणे शक्य होऊ शकेल, असेही त्‍यांनी सांगितले.

‘ताटकळत बसावे लागले नसते’, या मंत्री गिरीश महाजन यांच्या वक्तव्याचा संदर्भ देताना उपमुख्यमंत्री श्री. फडणवीस यांनीही उद्धव ठाकरे यांच्‍यावर निशाणा साधला.

राज्यामध्ये बंद दाराआड घरात बसून बैठक घेणारे नाही, तर जनतेमध्ये जाणारे मजबूत, काम करणारे आणि जनसामान्यांच्या भावना समजून घेणारे सरकार असल्‍याची टीका श्री. फडणवीस यांनी केली. त्यांच्या पोटदुखीचा लवकरच इलाज केला जाईल, असा टोला ठाकरे यांचे नाव न घेता लगावला.