अंबासन, (जि.नाशिक) : बागलाण तालुक्यातील इजमाने येथील शिवारातील शेतकरी किरण शंकर धोंडगे यांच्या पोल्ट्रीतील मृत कोंबड्यांची विल्हेवाट लावण्यासाठी खोदलेल्या खड्ड्यात बिबट्या पडल्याने ताहाराबाद वनपरिक्षेत्रातील कर्मचाऱ्यांनी रेस्क्यू ऑपरेशन राबवत खड्ड्यात पडलेल्या बिबट्याची सुटका केली. (Nashik Rescue of leopard that fell into pit of poultry farm in Ajman marathi news)

शेतीशिवारात शेतकरी किरण धोंडगे यांचा मुलगा रोहीत हा शेतातील (गट क्रमांक २८) मध्ये फेरफटका मारत असताना अचानक त्याला पोल्ट्रीतील मृत कोंबड्या विल्हेवाट लावण्यासाठी खोदलेल्या खड्ड्यातून बिबट्याची डरकाळी ऐकू आली. खड्ड्यात डोकावून पाहताच घाबरलेल्या अवस्थेत आजूबाजूस असलेल्या शेतकऱ्यांना माहिती दिली.

रोहीतने तातडीने ताहाराबाद येथील वनपरिक्षेत्र आधिकारी शिवाजी सहाणे यांना भ्रमणध्वनीवर संपर्क साधून सदर माहिती दिली. श्री. सहाणे यांनी ताबडतोब कर्मचाऱ्यांना सुचना करून कर्मचाऱ्यांनी इजमानेत दाखल होत खड्ड्यातून सुरक्षित बिबट्याला वाचविण्यासाठी धडपड सुरू केली. स्थानिक तरूणांच्या मदतीने खड्ड्यात तयार केलेली लाकडी सिडी सोडण्यात आली होती.

वनकर्मचा-यांनी बिबट्याला पाहण्यासाठी झालेली गर्दी पांगापांग केली व काही वेळातच खड्ड्यातील सिडीच्या साहाय्याने बिबट्याने जंगलात धूम ठोकली. यावेळी वनकर्मचा-यांसह वैभव धोंडगे, धनराज धोंडगे, गणेश धोंडगे, अभिजित धोंडगे, तुषार धोंडगे, नरेंद्र धोंडगे, निलेश धोंडगे, अभय धोंडगे आदिंनी बिबट्याला खड्ड्यातून बाहेर काढण्यासाठी मदत केली.

''इजमानेत बिबट्या खड्ड्यात पडल्याची माहीती मिळताच ताबडतोब बिबट्याला सुरक्षित बाहेर काढण्यासाठी रेस्क्यू ऑपरेशन राबविण्यात आले.'' -शिवाजी सहाणे, वनपरिक्षेत्र आधिकारी, ताहाराबाद.