वणी : मे महिन्यातील उन्हाच्या झळा तीव्र होत असताना वणी व परिसरात बुधवारी (ता.८) सुमारे तासभर मध्यम स्वरूपाच्या अवकाळी पावसाने हजेरी लावल्याने नागरिकांना उष्णतेपासून काहीसा दिलासा मिळाला असला तरी, कांदा उत्पादक शेतकऱ्यांचे पावसाने नुकसान झाल्याचा अंदाज व्यक्त होत आहे. (Unseasonal rain in Wani area for an hour)

बुधवारी (ता.८) दुपारी पाचच्या सुमारास वणी परिसरात अचानक ढगाळ वातावरण तयार होऊन मेघ गर्जनेसह सुमारे तासभर मध्यम स्वरूपाचा पाऊस झाला. अचानक आलेल्या पावसामुळे घराबाहेर कामानिमित्त पडलेल्या नागरिकांची तसेच येथील बाजार समितीच्या उपबाजार आवारात ट्रॅक्टर व पिकअपमधून कांदा विक्रीस आणलेल्या शेतकऱ्यांची त्रेधातिरपीट उडाली. (latest marathi news)

यावेळी शेतकऱ्यांची कांदा ताडपत्रीने झाकण्यासाठी एकच धावपळ उडाली तर काही शेतकऱ्यांचा उघड्यावर असलेला कांदा भिजल्याने नुकसान झाले. तसेच शेतातही काढून ठेवलेला कांदा भिजल्याने नुकसान झाले आहे.

दरम्यान अवकाळी पावसाने वातावरणात गारवा निर्माण झाल्याने उष्णतेपासून नागरिकांना काहीसा दिलासा मिळाला.