Nashik News : यशवंतराव चव्हाण महाराष्ट्र मुक्त विद्यापीठाच्या विविध शिक्षणक्रमांच्या शैक्षणिक वर्ष २०२३-२४ च्या उन्हाळी सत्र लेखी परीक्षांना सुरवात होत आहे. विविध ११५ शिक्षणक्रमांच्‍या परीक्षा शुक्रवार (ता. २४) पासून सुरू होत असून, त्या १२ जूनपर्यंत पार पडणार आहेत. राज्‍यात मुक्त विद्यापीठाच्या विविध ६०१ परीक्षा केंद्रांवर परीक्षा होणार आहे. (Yashwantrao Chavan Maharashtra Open University)

राज्‍यभरातून मुक्त विद्यापीठाच्या अभ्यास केंद्रावर प्रवेश घेतलेले सुमारे चार लाख ८९ हजार ६६० विद्यार्थी परीक्षा देत आहेत. परीक्षा सुरळीत होण्यासाठी विद्यापीठामार्फत विविध भरारी पथकांची नियुक्ती केली आहे. परीक्षा आयोजनाच्या सर्व मार्गदर्शन सूचना विभागीय केंद्रांमार्फत अभ्यास केंद्रांना दिल्‍या असून, विद्यार्थ्यांसाठी मदत यंत्रणाही कार्यरत आहे.

विद्यापीठाच्या संकेतस्‍थळावर मे २०२४ परीक्षेची संपूर्ण माहिती उपलब्‍ध करून दिली आहे. या संकेतस्थळाला विद्यार्थ्यांनी अद्ययावत माहितीकरिता वेळोवेळी भेट देण्याचे आवाहन केले आहे. विद्यार्थ्यांना प्रवेशपत्र उपलब्ध करून दिले असून, विद्यार्थ्यांनी ते पोर्टलवरून डाउनलोड करून घ्यावे. (latest marathi news)

त्याचप्रमाणे हॉल तिकिटावर नमूद केलेली तारीख आणि वेळेनुसारच परीक्षा द्यावयाची आहे. मुक्त विद्यापीठात शिक्षण घेणारे विद्यार्थी नोकरी, व्यवसाय, पोलिस, सैनिक, गृहिणी, शिक्षक इत्यादी विविध घटकातील आहेत. विविध ११५ शिक्षणक्रमांचा विविध विषय मिळून तब्बल तीस लाखांहून अधिक उत्तरपत्रिका लिहिल्या जातील.

कुलगुरू डॉ. संजीव सोनवणे, प्र-कुलगुरू डॉ. जोगेंद्रसिंह बिसेन यांच्या मार्गदर्शनाखाली नियोजित वेळापत्रकानुसार विद्यापीठाच्या परीक्षा सुरू होत असल्याची माहिती परीक्षा नियंत्रक भटूप्रसाद पाटील यांनी दिली.