नाशिक : निसर्गोपचाराने (Naturopathy) कोरोनावर (corona) यशस्वी मात करता येते, याची अनुभूती एकाच कुटुंबातील (family) चौघांनी घेतल्याची माहिती डॉ. अमित शिंपी यांनी दिली. तसेच निसर्गोपचारामध्ये ऑक्सिजनचे प्रमाण वाढत असल्याचे उपचाराअंती आढळून आले आहे. वाचा सविस्तर..

एकाच कुटुंबातील चौघांचा समावेश; ऑक्सिजनचे वाढते प्रमाण

नाशिक रोड भागातील अहिरे कुटुंबातील सदस्याला १५ एप्रिलला कोरोनाची बाधा झाली. त्यांच्यावर औषधोपचार सुरू झाले. दोन दिवसांनंतर त्यांची आई, पत्नी, मुलगा आणि भावजय पॉझिटिव्ह आल्या. भयभीत झालेल्या परिवारातील आईला रुग्णालयात दाखल केले. त्यांचे २७ एप्रिलला निधन झाले. सुरवातीला पॉझिटिव्ह आढळलेल्या सदस्यांचा सीटी स्कॅन स्कोअर सात झाला आणि ऑक्सिजनची पातळी ७० पर्यंत पोचली. या कुटुंबाने ओळखीतून डॉ. शिंपी यांचा परिचय करून घेतला. त्यानंतर २० एप्रिलपासून त्यांच्याकडे कुटुंबातील सर्वांनी निसर्गोपचार घेण्यास सुरवात केली. पहिल्या दिवसापासून फळांचा रस, नारळपाणी, आहार-व्यायाम आणि ॲक्युप्रेशर थेरपी सुरू केल्यावर तिसऱ्या दिवशी घरातील सर्व सदस्य ठणठणीत झाले. सर्वांची ऑक्सिजन पातळी ९७, ९८ अशी आहे. जेल रोड भागातील रहिवासी जाधव कुटुंबातील चौघांना कोरोनाची बाधा झाली. गृहिणीचा सीटी स्कॅन स्कोअर सहा, पतीचा चार होता. ऑक्सिजन कमी झाल्याने महापालिका रुग्णालयात दाखल करण्यात आले. प्रकृतीत सुधारणा होईना म्हणून खासगी रुग्णालयात दाखल केले. या ठिकाणी सीटी स्कॅन केल्यावर पतीचा स्कोअर दहा, पत्नीचा आठ झाला. दांपत्यावर उपचार केल्यावर चार दिवसांनंतर त्यांना घरी सोडले. घरी आल्यावर पतीची ऑक्सिजनची पातळी कमी होत गेल्याने घरच्यांची धास्ती वाढली. पुन्हा त्यांना खासगी रुग्णालयात नेले. डॉक्टरांनी तब्येत चांगली आहे म्हणून घरी पाठविले.

रुग्णाचे मनोबल वाढविण्याचा इलाज

दोन दिवसांनंतर त्यांची ऑक्सिजन लेव्हल ७० पर्यंत कमी झाली. पतीवर हृदयविकाराचे इलाज शहरातील खासगी रुग्णालयात सुरू आहेत. इथल्या डॉक्टरांच्या सल्ल्यानुसार सीटी स्कॅन केल्यावर स्कोअर २५ आला होता. मग व्हेंटिलेटरच्या खाटेचा शोध सुरू झाला. एका खासगी रुग्णालयाने त्यांना घरी पाठविले. कुटुंबाने डॉ. शिंपी यांच्याकडे निसर्गोपचार घेण्याचे ठरविले. आहार-व्यायाम आणि विशिष्ट ॲक्युप्रेशर उपचार आणि रुग्णाचे मनोबल वाढविण्याचा इलाज करण्यात आला. काही काढे आणि घरगुती तयार केलेले औषध देण्यात आले. तीन दिवसांनंतर त्यांचे ऑक्सिजनचे प्रमाण ९१ झाले. कफ बाहेर पडत गेला, श्‍वास मोकळा झाला. पाच दिवसांनंतर ऑक्सिजन ९७ पर्यंत पोचला.