नाशिक : महापलिका क्षेत्रात रॅपिड ॲन्टिजन किटचा तुटवडा भासत असताना जळगाव महापालिकेला दिलेल्या अठरा हजार किटवरून राजकीय वातावरण तापले आहे. जळगाव महापालिकेकडून परत किट मागविणे अपेक्षित असताना भाजपकडून शासनाकडे मागणी केली जात आहे, तर शिवसेनेने शासनाऐवजी जळगावहून किट मागवाव्यात, अशी मागणी करत माजी पालकमंत्र्यांवर निशाणा साधला. त्याला उत्तर देताना सभागृहनेते सतीश सोनवणे यांनी जळगावला भाजपने नव्हे, तर प्रशासनाने मानवी दृष्टिकोनातून किट दिल्याचे सांगितले. 

विरोधी पक्षनेते अजय बोरस्ते यांचा आरोप

शहरातत रॅपिड ॲन्टिजेन टेस्ट किटचा तुटवडा भासत असताना आमदार प्रा. देवयानी फरांदे यांनी शासनाकडे किटची मागणी केली. परंतु जळगाव महापालिकेसाठी यापूर्वी देण्यात आलेल्या अठरा हजार किटसाठी माजी पालकमंत्र्यांचा दबाव होता का, असा थेट सवाल विरोधी पक्षनेते अजय बोरस्ते यांनी करून किटच्या तुटवड्याला भारतीय जनता पक्षच जबाबदार असल्याचा आरोप केला. 

हेही वाचा > आश्चर्यंच! चोवीस तासांत एकाच लॅबमध्ये आला धक्कादायक रिपोर्ट; रुग्णाने सांगितली आपबिती

सभागृहनेते सतीश सोनवणे यांचे स्पष्टीकरण 

शासनाने महापालिकेला रॅपिड ॲन्टिजन किट देण्याची मागणीही केली. जळगाव महापालिकेकडून किटची मागणी करण्यात आली. त्या वेळी मानवी दृष्टिकोनातून किट देण्यात आले. त्यात भाजपचा किंवा माजी पालकमंत्र्यांचा काहीएक संबंध नाही. प्रशासनाने अठरा हजार किट परत देण्याच्या बोलीवर दिल्या होत्या. त्या अद्याप मिळाल्या नाहीत, त्यामुळे 'मिशन नाशिक झीरो' अभियानाला खीळ बसली असून, शासनाने नाशिकला किट उपलब्ध करून द्याव्यात, अशी मागणी श्री. सोनवणे यांनी केली आहे.

 हेही वाचा > नवनियुक्त आयुक्त दीपक पांडेंपुढे आव्हान! लाच स्वीकारताना पोलीस हवालदारावर एंटी करप्शनची कारवाई

संपादन - किशोरी वाघ