नाशिक : शहरासह ग्रामीण भागातही कोरोना विषाणूच्या फैलावाचा वेग वाढत असून, सरासरी चार दिवसांत हजारांहून अधिक रुग्ण आढळून आले. गुरुवारी (ता. १६) दिवसभरात तब्बल ३२६ नवीन रुग्ण आढळले. तर सहा रुग्णांचा मृत्यू झाला. त्यामुळे जिल्ह्यातील कोरोनाबाधितांची एकूण संख्या आठ हजार १६५ झाली, तर मृतांची संख्याही ३६५ वर पोचली आहे.

पाच हजार ३९४ रुग्णांना डिस्चार्ज

जिल्हाभरात आतापर्यंत पाच हजार ३९४ रुग्णांना घरी सोडण्यात आले आहे. तर उर्वरित रुग्णांवर उपचार सुरू आहेत. गुरुवारी आढळलेल्या रुग्णांपैकी जवळपास अडीचशे रुग्ण नाशिक शहरातील आहेत. मालेगाव महापालिका हद्दीतील दहा, तर उर्वरित नाशिक ग्रामीण भागातील आहेत. शहरातील नाशिक रोड, जेल रोडपाठोपाठ आता पंचवटी, म्हसरूळ, मखमलाबाद रोड या भागांमध्ये, तर ग्रामीण भागात सिन्नर, येवला, मनमाड येथे रुग्णसंख्या झपाट्याने वाढत आहे. दिवसभरात झालेल्या सहा मृत्यूंपैकी पाच नाशिक शहरातील आहेत. 

हेही वाचा > आयुक्तांची रात्री उशिरा रुग्णालयात एंट्री...चौकशीत मोठा खुलासा...नेमके काय घडले?

दिवसभरात ३२६ नवीन रुग्ण

शांती पार्क येथील ४५ वर्षीय पुरुष, जेल रोड येथील ५५ वर्षीय महिला, सिडकोच्या उत्तमनगर येथील ६४ वर्षीय पुरुष, महात्मानगर येथील ९४ वर्षीय पुरुष, तर जुने नाशिक येथील ७४ वर्षीय पुरुषाचा समावेश आहे. दिवसभरात ८७८ संशयित रुग्ण दाखल झाले असून, यातील ६१२ जण नाशिक शहरातील आहेत. ३० जण मालेगाव महापालिका हद्दीतील, तर १८३ रुग्ण ग्रामीण भागातील आहेत.  

हेही वाचा > हायटेक सल्ला पडला महागात; दोन एकरांतील ऊस जळून खाक...नेमके काय घडले?