नाशिक रोड : जिल्ह्यातील अनाथ मुलांना ओळखपत्र मिळावित, यासाठी १४ ते ३० नोव्हेंबर या कालावधीत अनाथ प्रमाणपत्र पंधरवडा साजरा होणार असून, त्यात अनाथ मुलांना प्रमाणपत्र दिले जाणार आहे. यात बालगृहातील अनाथ मुलांच्या आई-वडील, नातेवाइकांचा शोध घेतला जाणार आहे. महिला व बालविकास अधिकारी अजय फडोळ यांनी ही माहिती दिली. 

अनाथ मुलांच्या पालकांचा घेणार शोध
रस्ता, मंदिर किंवा अन्यत्र आढळेलेली अनाथ बालके बालगृहात दाखल केली जातात. ज्यांना पालक नाहीत, किंवा जबाबदारी घेण्यास नातेवाईक तयार नाहीत, त्या मुलांना बालगृहात ठेवले जाते. त्यांची शिक्षण, संगोपनासह संपूर्ण काळजी घेतली जाते. अशा मुलांना शिक्षण देऊन बालगृहातून बाहेर पडल्यानंतर विविध प्रकारचे दाखले मिळण्यास अडचणी येतात. जातीचा दाखलाही मिळत नाही. त्यामुळे शासनाच्या विविध योजना, नोकऱ्यांपासून ते वंचित राहतात. यामुळे शासनाने अशा अनाथ मुलांना प्रमाणपत्र देण्याचा निर्णय घेतला होता. यामध्ये आई-वडील, नातेवाईक असे कोणीच नसलेली मुले आणि नातेवाईक असलेली अनाथ मुले असे दोन भाग आहेत. दोन्हींना प्रमाणपत्रे दिली जातात. मात्र, आई-वडील, नातेवाईक कोणीच नसलेल्या अनाथ प्रमाणपत्रधारकांना शासकीय नोकरीत एक टक्का आरक्षण दिले जाते. अनाथ प्रमाणपत्र पंधरवड्यात बालगृहातील अनाथ मुलांच्या पालकांचा शोध घेतला जाणार आहे. 

हेही वाचा >  एक हात बिबट्याच्या जबड्यात, तरीही चिमुकला थेट भिडलाच; 12 वर्षांच्या गौरवची धाडसी झुंज

प्रस्ताव पाठवणार 
बालगृहाचे अधीक्षक हे जिल्हा महिला व बालविकास अधिकाऱ्यांकडे प्रमाणपत्रासाठी प्रस्ताव दाखल करतील. सत्यता पडताळून हे प्रस्ताव विभागीय उपायुक्त महिला व बालविकास विभागाकडे पाठविण्यात येतील. त्यांच्या मंजुरीनंतर प्रमाणपत्रे दिले जाईल. 

हेही वाचा >  काय बोलावं आता! जेव्हा न्यायाधिशांच्याच घरी होते चोरी; मुळासकट पुरावे नष्ट

उपयुक्तांकडे आलेले प्रस्ताव - १३ 
बालकल्याण समितीकडे प्रस्ताव - एक 
त्रुटी पूर्ततेसाठी पाठविलेले प्रस्ताव - सहा