नाशिक : शहरात विनाकारण वावरणाऱ्या टवाळखोर, रिकामटेकड्यांना शहर पोलिसांनी पुन्हा दंडुक्याचा प्रसाद दिला. नाकाबंदीच्या ठिकाणीही वाहनांवरून फिरणाऱ्यांची पोलिसांनी चौकशी केल्याने कारवाईच्या भीतीपोटी अनेकांनी घरात कोंडून घेतले.(Police on action mode in nashik)

पोलिस ॲक्शन मोडवर; टवाळखोरांची धांदल

१२ मेपासून कठोर निर्बंध लागू करण्यात आले. सुरवातीस पोलिसांनी कठोर भूमिका घेतल्याने विनाकारण फिरणाऱ्यांना दंडुक्याचा मारा बसलाच सोबत दंडात्मक कारवाईदेखील केली. यामुळे काही दिवस टवाळखोर, रिकामटेकडे प्रवास करणारे दिसेनासे झाले होते. दरम्यान, कोरोनाचा(Corona) आलेख उतरत असताना दुसरीकडे पोलिसही थंडावल्याचे चित्र होते. त्यामुळे शहरातील रस्त्यांवर गर्दी दिसत होती. त्यातून कोरोनाचा संसर्ग फैलावण्याचा धोका होता. मात्र, गुरुवारी शहर पोलिस पुन्हा सतर्क झाल्याचे दिसून आले. शहरातील नाकाबंदी पुन्हा कठोर करून वाहन तपासणी सुरु होती. तसेच विनाकारण फिरणाऱ्यांवर कठोर कारवाई करण्यात आली. शहरात मेनरोडवरही पोलिसांनी विनाकारण फिरणाऱ्यांवर कारवाई केली. टवाळखोरांना पोलिसांनी दंडुक्याचा प्रसाद देत दंडात्मक कारवाई केली. त्याचप्रमाणे विनापरवानगी दुकाने सुरु ठेवणाऱ्या व्यावसायिकांवरही पोलिसांनी कारवाई केली. शहरातील नाकाबंदीच्या ठिकाणी वाहनांची चोख तपासणी करण्यात आली. मात्र यावेळी काही नाकाबंदीच्या ठिकाणी वाहनांच्या लांब रांगा पहावयास मिळाल्या. पोलिसांनी गस्त वाढविल्याने नागरिकांना विनाकारण वावरण्यास मर्यादा आल्या होत्या. अचानक पोलिस ॲक्शन मोडवर आल्याने टवाळखोरांची धांदल उडाली.