नाशिक : महापालिकेच्या कुठल्याही कामासंदर्भात कार्यारंभ आदेश द्यायचा असेल, तर संबंधित विभागप्रमुख किंवा अभियंता वर्गातील कार्यकारी अभियंता यांच्या स्वाक्षरीनेच प्रक्रिया पार पाडली जाते. भविष्यात कायदेशीर अडचण निर्माण झाल्यास न्यायालयात विभागप्रमुखांनाच उत्तरे द्यावी लागतात. मात्र आता महापालिकेत नवा पायंडा पाडला जात असून, नव्याने रुजू झालेले अतिरिक्त आयुक्त सुरेश खाडे यांनी स्वतःकडे अधिकार घेतल्याने अधिकारी वर्गात नाराजीला तोंड फुटले आहे. 

महापालिकेत अधिकाऱ्यांत नाराजी; संशयाचे वलय 
नगरसेवक किंवा आयुक्तांमार्फत विकासकामांचे प्रस्ताव सादर केले जातात. प्रस्ताव सादर झाल्यानंतर त्याचे प्राकलन तयार केले जाते. प्राकलन तयार झाल्यानंतर पाच लाखांच्या आत प्रस्तावाची किंमत असेल, तर विभागीय स्तरावर मंजुरी मिळते. प्रस्तावाची किंमत पाच लाखांपेक्षा अधिक असल्यास महासभा त्यानंतर स्थायी समितीवर मंजुरी मिळते. संबंधित कामाची निविदाप्रक्रिया राबविल्यानंतर पुन्हा स्थायी समितीची मंजुरी घेतली जाते. स्थायी समितीची प्रस्तावावर मोहोर उमटल्यानंतर कार्यारंभ आदेश दिले जातात.

संशयाचे वलय निर्माण

बांधकाम, पाणीपुरवठा व मलनिस्सारणासंदर्भातील सर्वाधिक प्रस्ताव असल्याने कार्यकारी अभियंता तर त्या-त्या विभागप्रमुखांच्या स्वाक्षरीने कार्यारंभ आदेश दिले जातात. महापालिकेच्या स्थापनेपासून याच पद्धतीने कामकाज सुरू असताना नव्याने रुजू झालेले अतिरिक्त आयुक्त सुरेश खाडे यांनी मात्र अधिकारांच्या या पद्धतीला ओव्हरटेक करत कार्यारंभ आदेश देण्याचे अधिकार स्वतःकडे घेतल्याने अधिकारीवर्गात नाराजी पसरली आहे. एखाद्या कामाबद्दल कायदेशीर अडचण निर्माण झाल्यास संबंधित अधिकाऱ्याला न्यायालयात खुलासा करावा लागत असल्याने कार्यारंभ आदेश देण्याचे अधिकारही त्याच अधिकाऱ्याकडे असणे अपेक्षित आहे. अतिरिक्त आयुक्त खाडे यांच्या या भूमिकेने त्यांच्याभोवती संशयाचे वलय निर्माण झाले आहे. 

हेही वाचा > ह्रदयद्रावक; आजोबांना दोन घास दिल्याचे समाधान घेऊनच नात झाली देवाला प्रिय, दसऱ्याच्या दिवशीच हळहळ

स्थानिक विरुद्ध परसेवा विरोधाला धार 
महापालिकेत अतिरिक्त आयुक्तांपासून ते उपायुक्त या महत्त्वाच्या पदांवर परसेवेतील अधिकारी कार्यरत आहेत. यातून स्थानिक अधिकाऱ्यांना संधी मिळत नसल्याने नाराजी पसरली आहे. त्यात अतिरिक्त आयुक्त खाडे यांच्या कार्यारंभ आदेश स्वतः देण्याच्या भूमिकेवरून वादात आणखी भर पडली असून, स्थानिक विरुद्ध परसेवेतील अधिकारी विरोधाला नव्याने धार चढली आहे. 
 

हेही वाचा >  पिंपळगावच्या टोमॅटोचा देशभरात डंका! सव्वाचारशे कोटी शेतकऱ्यांच्या पदरात 

नियमानुसारच अधिकार माझ्याकडेच

पाच ते दहा लाखांच्या प्रस्तावांचे कार्यारंभ आदेश देण्याचे अधिकार अतिरिक्त आयुक्तांनाच आहेत. मी नियमानुसारच अधिकार माझ्याकडे घेतले असून, यात चुकीचे काही नाही. -सुरेश खाडे, अतिरिक्त आयुक्त, महापालिका