नाशिक : महापालिका (Nashik Municipal Corporation) रुग्णालयात सिंहस्थ निधीतून बसविण्यात आलेल्या सिटी स्कॅन, एमआरआय मशिनच्या माध्यमातून केल्या जाणाऱ्या विविध प्रकारच्या चाचण्यांसाठी दर निश्चित करण्यात आली आहे. खासगी रुग्णालय (Private hospital) व आस्थापनांच्या तुलनेत ३० ते ४० टक्‍क्‍यांनी दर कमी करण्यात आले आहे. वैद्यकीय विभागाने यासंदर्भात महासभेवर सादर केलेल्या दरसूची वर शिक्कामोर्तब करण्यात आले.

महापालिकेकडून नवीन बिटको रूग्णालयात सिंहस्थ निधीतून एमआरआय मशिन व सिटी स्कॅन सुविधा उपलब्ध करून देण्यात आली आहे. मात्र, गेल्या अनेक महिन्यांपासून विविध कारणांमुळे यंत्रणा सुरू नव्हती. यामध्ये दराचा महत्त्वाचा प्रश्न होता. विविध चाचण्यांचे दर निश्‍चित होत नसल्याने यंत्रणा सुरू नव्हती. यासंदर्भात वैद्यकीय विभागाने महासभेवर प्रस्ताव सादर केला होता. त्यात विविध चाचण्यांसाठी शासकीय दर निश्चित करण्यात आले. खासगी रुग्णालयांच्या तुलनेत ३० ते ४० टक्‍क्‍यांच्या दरम्यान चाचण्यांचे दर राहणार आहे. यापूर्वी शहर व ग्रामीण भागातील गरीब रुग्णांना जिल्हा रुग्णालयात चाचण्यांसाठी जावे लागत होते. आता महापालिकेने दर निश्चित करताना, यंत्रणा सुरू केल्याने शहर व परिसरातील गरीब रुग्णांना त्याचा मोठा लाभ होईल.

असे आहेत चाचण्यांचे दर (रुपयात)-

चाचणीचा प्रकार खासगी - दर महापालिकेचे दर

• सिटी स्कॅन ब्रेन- २५०० - ८००

• सिटी स्कॅन स्पाईन- ३ ते ६ हजार - १४०० ते १७००

• सिटी स्कॅन नेक, फेस- ३ ते ६ हजार - १४०० ते १७००

• सिटी स्कॅन चेस्ट- २५०० - ८००

• सिटी स्कॅन अ‍ॅबडोमेन- ७५०० - २२०० ते ४५००

• एमआरआय ब्रेन- २५०० - ८००

• एमआरआय जॉइंट- ६००० - २३५०

• एमआरआय, फेस, नेक, चेस्ट- ३ ते ६ हजार - १४०० ते १७००

• एमआरआय युरोग्राफी- ६००० - २३५०

• एमआरआय अ‍ॅबडोमेन- ६००० - २३५०